BE-ja thotë se do të pasojnë akuza për krime lufte nëse verifikohet videoja e ekzekutimit brutal të ushtarit ukrainas

Bashkimi Evropian ka sugjeruar se do të ngrihen akuza për krime lufte kundër ushtarëve rusë që supozohet se janë filmuar duke i prerë kokën një të burgosuri ukrainas, nëse verifikohen pamjet e incidentit.

Bëhet fjalë për një video që ka qarkulluar në rrjetet sociale në të cilën duket se shfaqet një ushtar duke mbajtur një thikë dhe duke i prerë kokën një burri që thuhet se është një i burgosur lufte ukrainas, transmeton Telegrafi.

Zëdhënësja e Komisionit Evropian, Nabila Massrali tha: “Nëse konfirmohet, është një kujtesë tjetër brutale për natyrën çnjerëzore të agresionit rus”.

Lexo po ashtu Reagon Zelensky, pas publikimit të pamjeve që tregojnë se si "bishat ruse" i prenë kokën një të burgosuri ukrainas të luftës

Vrasja e robërve të luftës është “një shkelje shumë e rëndë e Konventës së Gjenevës”, tha ajo.

“BE përsërit angazhimin e saj të vendosur për të mbajtur para përgjegjësisë të gjithë autorët dhe bashkëpunëtorët e krimeve të luftës”.

Lexo po ashtu Ukraina u bën thirrje njerëzve që të "ndalojnë shpërndarjen" e videos që pretendon të tregojë prerjen e kokës së një ushtari ukrainas nga rusët

Ndryshe një reagim kishte ardhur edhe nga presidenti ukrainas Volodymyr Zelensky i cili denoncoi të mërkurën “bishat” ruse pasi një video u shfaq në mediat sociale që pretendonte se tregonte prerjen e kokës së një të burgosuri lufte ukrainas.

“Ka diçka që askush në botë nuk mund ta injorojë: sa lehtë vrasin këto bisha… ne nuk do të harrojmë asgjë, as nuk do të falim vrasësit”, citohet të ketë thënë Zelensky në një mesazh në mediat sociale, duke u zotuar se do të sjellë drejtësi. /Telegrafi/