BE-ja miraton ndihmën e re ushtarake prej rreth 500 milionë eurove për Ukrainën

Bashkimi Evropian miratoi të mërkurën pakon e re të ndihmës ushtarake në vlerë të 500 milionë eurove për Ukrainën.

Në total, BE-ja deri më tani ka ndarë rreth 1.5 miliard euro ndihma për t’u mbrojtur kundër forcave ruse, raporton cnn.

Paketa e re do të financojë sigurimin e pajisjeve dhe furnizimeve për Forcat e Armatosura të Ukrainës, të cilat përfshijnë “pajisje mbrojtëse personale, pajisje të ndihmës së parë dhe karburant, si dhe pajisje ushtarake të dizajnuara për të shkaktuar plagë vdekjeprurëse”, njoftoi Këshilli Evropian.

Lexo po ashtu Zelensky zbulon llojin e armatimit për të cilën ka nevojë Ukraina

“Ndërsa Rusia përgatitet për një ofensivë në lindje të Ukrainës, është thelbësore që ne të vazhdojmë dhe të shtojmë mbështetjen tonë ushtarake për Ukrainën. Në këtë formë ajo do të mbrojë territorin dhe popullsinë e saj dhe do t’i parandalojë vuajtjet e mëtejshme”, tha Josep Borrell, shefi i politikës së jashtme të BE-së.

Ndryshe, presidenti ukrainas, Volodymyr Zelensky ka zbuluar sot përmes një videoje se çfarë armatimi shtesë i duhet vendit të tij. /Telegrafi/