Hoti mohon se u hoq nga marrëveshja pika për njohjen, i reagon edhe Osmanit pasi e quajti arrogant

Kryeministri i Kosovës, Avdullah Hoti ka mohuar zërat që nga marrëveshja e arritur me Serbinë është hequr pika numër 10, që parashihte që Serbia ta njihte Kosovën.

Hoti në një konferencë për media, ka thënë se që nga fillimi e kanë ditur se takimi ka të bëjë me çështje ekonomike, transmeton Telegrafi.

“Ne e kemi ditë se kur po shkojmë në takim, po shkojmë për një takim që është pjesë e procesit të dialogut me agjendë ekonomike dhe kemi përfundu me një marrëveshje që ka të bëjë më normalizim të marrëdhënieve ekonomike dhe me disa elemente politike. Pika 10 që po referohet në media, nuk qëndron. Është marrëveshje për normalizim ekonomik, pra nuk qëndron.
Nuk besoj që dikush që ka qenë në Prishtinë, ka më shumë informata se delegacioni që ka qenë në Shtëpinë e Bardhë”, tha ai para mediave.

Lexo po ashtu Osmani e quan Hotin arrogant, thotë se ai nuk e di çfarë flet

Kurse sa i përket kritikave të kryeparalamentares Osmani, Hoti pohoi se është personi i fundit që dikush mund ta quaj arrogant.

“Jam personi i fundit që dikush mund të më quaj arrogant. Mund të kem të meta tjera sikur të gjithë njerëzit, por këtë nuk e kam. Zonja Osmani e kupton pas tri viteve se është gabim”.

Ndryshe, Osmani para disa ditësh në një konferencë për media ka kritikuar kryeministrin Avdullah Hoti, duke thënë se ai nuk di se çka flet.

“Zotëri Hoti nuk e di çka flet, kjo qasje arrogante e tij është për të ardhur keq për një kryeministër të vendit dhe nëse i kthehemi mbrapa historisë do ta shihni sesa herë kam qenë kundër një gjëje, zotëri Hotit dhe shokëve të tij iu janë dashur gjashtë vite dhe pastaj prapë kanë ardhur aty ku kam qenë unë. Shembull, kur unë e kritikoja koalicionin me PDK-në ata e përkrahnin pastaj erdhën të fjalët e mia, kur unë e kritikoja zgjedhjen e Thaçit presidentit ata e përkrahnin dhe pastaj erdhën të fjalët e mia. Edhe te kjo do të vijën por do të jetë tepër vonë për dëmin që kanë bërë, duke shkelur vullnetin qytetar”, kishte deklaruar Osmani./ Telegrafi/