Haziri: Haradinaj e ka kuptuar situatën, PDK të rrëzon vetëm kur hesht (Video)

Kryetari i Gjilanit dhe nënkryetari i LDK-së, Lutfi Haziri ka thënë se PDK-ja të rrëzon vetëm kur heshtë e jo kur kërcënon publikisht.

Haziri, në “Debat Plus” me Ermal Pandurin në RTV Dukagjini, ka thënë se Haradinaj po e vlerëson drejtë situatën brenda koalicionit qeverisës.

“Sa herë që PDK-ja kërcënon publikisht, dije që i ke punët mirë. Nuk ndodh asgjë. I kemi tri zona nga PDK që po bëjnë ftesa publike ndaj Haradinajt. Kryeministri e di që është nata më e qetë dhe më e mirë e tij”.

Nënkryetari i LDK-së, ka thënë se PDK është e vetmja parti e izoluar në Kosovë që më askush nuk ka besim te ta.

“Te PDK-ja asnjë parti e opozitës nuk ka besim, e asnjë parti që është në Qeveri nuk ka besim. Askush më nuk ju beson”.

Kryetari i Gjilanit i është përgjigjur edhe zëvendëskryetarit të PDK-së, Enver Hoxhaj, për një përfshirje të mundshme të LDK-së në bisedime. Ai ka thënë se PDK është dashur të mendohet mirë para dy viteve kur ka marrë vendim për rrëzimin e Isa Mustafës.

“Hoxhaj ndoshta e ka një të drejtë morale për të folur pasi ai dhe zoti Kuçi kanë qenë kundër prishjes së koalicionit me LDK-në. Por tash është vonë,  PDK vetëm mund ta ëndërrojë koalicionin me LDK-në”, tha ndër të tjera Lutfi Haziri./Telegrafi/