Hapet edicioni i 43-të i festivalit të teatrove

Festivali i teatrove “Ferizaj 2013” hapet sonte (8 tetor) për të vazhduar deri më 14 të këtij muaji, ku do të ndahen çmimet për shfaqjen më të mirë, regjinë më të mirë, aktoren dhe aktorin më të mirë, pastaj rolin dytësor më të mirë për meshkuj e femra, rolin më të mirë episodik, si dhe shpërblimi i mediave.

Ky festival shënon edicionin e 43-të me radhë, ku nata e parë do të shënohet në Prishtinë në Teatrin Kombëtar të Kosovës me shfaqjen “Mbas Zonjushës Julie” nën regjinë e Kushtrim Koliqit.

Ndërsa, siç transmeton Kosovapress, në Ferizaj do të shfaqet “S’mund të paguajmë” me regji të Zana Hoxha-Krasniqit, pastaj “Shtriga e Salemit” me regji të Sefedin Nuradinit do të shfaqet në Kumanovë. Në Tiranë më 11 tetor shfaqet “Tri mendje në ankand” nga Elma Doresi, pastaj në Shkup “Jetë me qira” nga Luka Kortina.

Festivali vazhdon me 13 tetor në Gjilan, ku do të shfaqet “Pacienti i dr. Frojdit”, me regji të Erson Zymberit dhe mbyllet në Prishtinë në Teatrin Dodona me shfaqjen “Ku, çka” nga Elmaze Nura.

Në këtë edicion do të ndahen çmimet si: shfaqja më e mirë, regjia më e mirë, aktorja më e mirë, aktori më i mirë, roli dytësor më i mirë për meshkuj, roli dytësor më i mirë për femra, roli më i mirë episodik dhe shpërblimi i mediave.

Juria e Festivalit përbëhet nga: Fadil Hysaj, Drita Krasniqi dhe Agim Selimi. Udhëheqës i tavolinave do të jetë Haqif Mulliqi dhe kritikë të festivalit Nebi Islami dhe Josif Papagjoni.