Gjilani zhvendoset në Drenas për ndeshjet si vendas pas dënimit nga FFK

SC Gjilani ka marrë një dënim nga FFK për shkak se disa persona sulmuan gjyqtarin në ndeshjen ndaj Llapit.

Gjilanasit triumfuan 3-0 ndaj Llapit, por pas përfundimit të ndeshjes tre persona sulmuan gjyqtarin anësor Meriton Berisha.

E për këtë gjë FFK e ka dënuar Gjilanin me dy ndeshje jashtë shtëpisë së tyre si dhe një shumë prej pesë mijë eurove.

Këto dy takime skuadra e trajnerit Gentijan Mezani ka vendosur t’i zhvillojë në Drenas.

Ka qenë vetë klubi gjilanas që ka konfirmuar nëpërmjet një njoftimi për shtyp se dy ndeshjet e ardhshme si vendas do t’i luaj në Drenas.

“Skuadra jonë pas dënimit detyrohet që dy ndeshje t’i zhvillojë jashtë stadiumit “Agim Ramadani-Katana” të Gjilanit pa praninë e tifozëve”.

“Bëjmë të ditur se ndeshja kundër Trepçës ’89 do të zhvillohet në stadiumin “Rexhep Rexhepi” në Drenas, ku pas kërkesës sonë kemi hasur në përgjigje pozitive nga Feronikeli, dhe i falënderojmë për bashkëpunimin dhe mundësinë e ofruar nga ta”, shkruhet në njoftimin e Gjilanit. /Telegrafi/