Gjermania i dorëzoi armë të fuqishme Ukrainës – ky obus është më moderni në botë

Ministri gjerman i Mbrojtjes, Boris Pistorius i dorëzoi Ukrainës obusin e ri vetëlëvizës me rrota të tipit RCH 155 “Ukraina, dhe ky është një sinjal, se ukrainasit mund të llogarisin tek ne. Gjermania është e gatshme të marrë përgjegjësinë në Evropë”, tha politikani i SPD-së në Kassel, ku prodhuesi i tankeve KNDS prodhon këtë sistem armësh.

Ambasadori ukrainas, Oleksiy Makeyev mori në mënyrë simbolike dorëzimin e të parës nga një total prej 54 obusi vetëlëvizës që Gjermania do t’i dorëzojë Ukrainës. Gjashtë sistemet e para do të mbeten fillimisht në Gjermani për t’u përdorur për trajnimin e ushtarëve ukrainas.

“Nuk kemi nevojë për ndërmjetës, na duhen aleatë”, tha ambasadori lidhur me negociatat e mundshme për përfundimin e luftës.

“Paqja duhet fituar. Është mirë të dimë se Gjermania është në anën e Ukrainës”, shtoi ai.

Siç shkruan Kyiv Independent, bëhet fjalë për obus me armë të kalibrit 155 mm, të montuara në një automjet të blinduar me katër akse (“8×8”).

KNDS, një ndërmarrje e përbashkët midis KMW të Gjermanisë dhe Nexter të Francës, thekson se RCH 155 mund të lëshojë deri në nëntë raketa në minutë. Howitzer vetëlëvizës RCH-155 është një kombinim i personelit të blinduar GTK Boxer dhe frëngjisë së automatizuar të artilerisë PzH 2000.

Ai gjuan predha 155 mm në një distancë deri në 54 kilometra. Falë bazës së saj me rrota, e ngjashme me një automjet të rëndë të blinduar, ai mund të lëvizë shpejt në dhe jashtë rrugës me një shpejtësi prej më shumë se 100 kilometra në orë. Ukraina është vendi i parë që ka marrë RCH 155 të ri. /Telegrafi/