Gjen kërmill me gjithë mbështjellës në mish pule

Kompania Ginsters është dashur t’i kërkojë falje një të riu, i cili në produktin e tyre ka gjetur një kërmill të plotë së bashku me shtëpizën e tij.

21-vjeçari, Simon Enticknap kishte blerë një kifle me mish pule dhe kërpudha për mëngjes ku edhe e ka gjetur këtë befasi të pakëndshme. Pas kafshimit të parë e ka hetuar se diçka po i kërciste nëpër dhëmbë.

"Në të ishte një kërmill i plotë. Ka qenë shumë tmerruese. Në të ardhmen me më qejf do të shkoj i uritur në punë”, ka thënë i riu për gazetën e përditshme britanike The Daily Mail.

"Më ka ardhur të vjellë në momentin që kam kuptuar se çfarë kam qitur nga goja", ka thënë Simon. "Kjo është gjëja e fundit që prisni ta gjeni në një kifle", ka shtuar ai.

I riu ka fotografuar shujtën e tij dhe më pas ka lajmëruar kompaninë Ginsters zëdhënësi i së cilës, Larry File, në formë të shkruar i ka kërkuar ndjesë blerësit dhe ka dërguar bashkëpunëtorët e tij për të sjellë produktin që të mund ta shikojnë në kompani.

Supozohet se kërmilli kishte mbetur në kërpudha.