Furnizimi me rrymë nga importi

Prodhimi i Korporatës Energjetike të Kosovës (KEK), me vetëm dy blloqe nuk garanton stabilitet për furnizim me energjie elektrike, pasi që nevojat për energji nga prodhimi vendorë nuk mbulohen në masë të mjaftueshme. KEK-u eshët duke prodhuar me dy blloqe 390 megavat orë energji elektrike, deri sa pjesa më e madhe mbulohet nga importi.

Mos prodhimi i energjisë elektrike në blloqet e KEK-ut përveç që imponon reduktime detyron edhe import të energjisë për të mbajtur sa më stabil furnizimin me energji elektrike.

Zyrtarët e KEK-ut kanë thënë se janë duke prodhuar me dy blloqe. “Aktualisht në operim është blloku A-4 i Termocentralit ‘Kosova A’ me 130 megavat për orë energji elektrike dhe blloku B-1 i Termocentralit ‘Kosova B’ me 260 megavat për orë energji elektrike”, ka treguar zëdhënësi i KEK-ut Skender Bucolli.

KEK sipas tij, ka planifikuar që ta rikthej në punë bllokun e dytë të Termocentrali “Kosova B”. “Nga sot ora 24 është paraparë hyrja në operim edhe e Bllokut B-2 të Termocentrali ‘Kosova B’ me një kapacitet prej 250 megavat për orë energji elektrike”, ka thënë Skender Bucolli.

Ndërkaq zëdhënësi i KEDS-it Viktor Buzhala ka thënë se mungesat e energjisë elektrike janë duke i mbuluar nga importi, shkruan Telegrafi.

Ai ka treguar se KEK-u është duke i prodhuar rreth 400 megavat energji elektrike, deri sa furnizimi ka thënë se është stabil. “Importi në kohë piku është duke shkuar në mbi 500 megavat për orë. Qëllimi i KEDS-it kryesor mbetet furnizimi sa më i mirë me energji elektrike, por duke pasur parasysh rënien drastike të prodhimit vendor të energjisë elektrike dhe kërkesën e madhe në rajon për energji, është duke u bërë gjithnjë e më i vështiri furnizimi i pandërprerë”, thekson Buzhala.

Ai ka treguar se importi i shtrenjtë i rrymës është duke krijuar humbje të mëdha në sektorin e energjisë. “Ne, edhe sot pas përpjekjeve të mëdha, kemi siguruar import shtesë gjë që ka bërë që konsumatorët të mos e ndiejnë gjendjen e krijuar”, ka thënë zëdhënësi i KEDS-it, Viktor Buzhala.
Ai ka treguar se në kohë piku kërkesa për konsum të energjisë elektrike e kalon 1000 megavat për orë.

Kurse në Ministrinë e Zhvillimit Ekonomik (MZHE), kanë thënë se pas fillimit të heqjes së dheut nga KEK-u presin që të përmirësohet gjendja.

“Me rregullimin e situatës në Shipitullë dhe me aktivizimin e ekskavatorëve, nuk shohim ndonjë nevojë për ndarje të mjeteve për import të rrymës pasi që do të prodhohet me kapacitete të plota. Nga ana tjetër, KEDS ka një buxhet të caktuar që mbulon importet deri në një shumë të caktuar dhe nëse importet rriten jashtë çdo parashikimi, atëherë Qeveria duhet të involvohet për të normalizuar situatën”, është thënë në përgjigjet e Divizionit për Komunikim me Publikun të MZHE-së. /Telegrafi/