Fjalimi i Kurtit në Internacionalen e Socialistëve në Spanjë, Çeku: Borrell e duartrokiti ngrohtësisht

Pas përplasjeve që patën lidhur me çështjen e targave, kryeministri i Kosovës, Albin Kurti dhe përfaqësuesi i Lartë i Bashkimit për Punët e Jashtme dhe Politikën e Sigurisë, Josep Borrell, janë takuar në Spanjë, ku kanë marrë pjesë në Kongresin e Internacionales Socialiste.

Fjalimi i kreut të ekzekutivit kosovar në këtë tubim është duartrokitur ngrohtësisht nga përfaqësuesi i BE-së, Josep Borrell.

Kështu thotë ministri i Qeverisë Kurti II, Hajrulla Çeku, i cili vizitën e kryeministrit në Spanjë e cilësoi si të shkëlqyeshme.

“Përveç pjesëmarrjes në Kongresin e Internacionales Socialiste dhe fjalimit të tij që u duartrokit ngrohtësisht edhe nga Josep Borrell, Kryeministri Kurti zhvilloi takime me liderë shtetërorë e partiakë nga Evropa dhe bota, përfshirë shtetet që nuk e njohin Kosovën”, shkruan ai në Facebook.

“Ndër shumë, Kryeministri Kurti u takua me Kryeministrin e Spanjës, Pedro Sanchez, ish Kryeministrin e Greqisë dhe deputetin e Asamblesë Parlamentare të Këshillit të Europës, George Papandreou, ish Sekretarin e Përgjithshëm të NATO-s, Javier Solana dhe Kryetarin e Malit të Zi, Milo Djukanovic”.

Tutje, Çeku thotë se Kurti ka deklaruar që paqja e vërtetë në Ballkanin Perëndimor arrihet vetëm kur do të ketë një Serbi më demokratike.

“Megjithatë, ka theksuar se mbetet i përkushtuar ndaj dialogu të lehtësuar nga BE-ja me lidershipin aktual të Serbisë, me të cilët nuk ndajnë të njëjtat vlera”, shkruan tutje ai.

Kurti në Kongresin e 26-të të Internacionales Socialiste në Spanjë, ka thënë se për fat të keq Serbia ka lidhje të ngushta me Kremlinin.

“Fatkeqësisht, fqinji ynë në veri, dhe ai me të cilin Republika e Kosovës ndan kufirin më të gjatë, është ende një vend autoritar me aspirata territoriale ndaj nesh dhe me lidhje të gjera dhe të ngushta me Kremlinin. Që nga viti 1999, ata na kanë kërcënuar vazhdimisht me sjellje luftarake. Deri më sot, ata mbajnë 48 baza ushtarake dhe xhandarmërie në të gjithë kufirin e saj me Kosovën. Për më tepër, që nga shpallja jonë e pavarësisë në vitin 2008, ajo është angazhuar vazhdimisht në fushata që synojnë të minojnë shtetësinë tonë. Edhe pse në vitin 2010, Serbia kërkoi mendimin e Gjykatës Ndërkombëtare të Drejtësisë për ligjshmërinë e pavarësisë sonë, ajo ka zgjedhur të mos respektojë gjetjet e gjykatës. Kohët e fundit, ajo është përpjekur të përdorë ndikimin e saj në pjesën veriore të vendit tonë për të minuar sundimin e ligjit në atë rajon”.

“Është e qartë, pra, se ajo që kemi pasur në 23 vitet e fundit mes dy vendeve tona është më tepër një armëpushim i thjeshtë sesa një paqe e vërtetë. Pyetja e qartë është: si t’i afrohemi paqes së vërtetë? Unë besoj se forcimi i demokracisë në Serbi është përgjigja. Kjo mund të duket si një goditje e gjatë për disa, dhe si një e vërtetë e thjeshtë për të tjerët – megjithatë, kjo është mënyra e vetme që ne dimë për të krijuar kushte për paqen afatgjatë”, ka thënë ai.

Megjithatë, ka theksuar se Kosova u angazhua në dialog të hapur demokratik në Bruksel, të ndihmuar nga Bashkimi Evropian, pasi “vendi ynë beson në demokraci”.

“Ne diskutojmë me ata që nuk ndajnë të njëjtat besime dhe që nuk kanë të njëjtin realitet. Një ndryshim demokratik në politikë është diçka që mund ta bëjë vetëm populli, por ka mënyra se si mund ta ndihmojmë atë nga jashtë. Solidariteti me forcat progresive në vende të tjera që nuk janë ende demokratike dhe duke u treguar si shembull për botën, janë rruga përpara. Qeveria ime po fokusohet në zhvillimin e ekonomisë sonë, reformimin e sistemit tonë të drejtësisë dhe forcimin e kapaciteteve tona mbrojtëse. Paralelisht, unë mbetem i përkushtuar ndaj këtij dialogu të lehtësuar nga BE-ja me lidershipin aktual të Serbisë. Dialogu edhe me ata që nuk ndajnë të njëjtat vlera”, është shprehur tutje kryeministri Kurti. /Telegrafi/