Fitore e thellë e Drenicës, Flamurtari mbetet në fund

Drenica ka shënuar fitore të thellë 4-1 në përballje me Flamurtarin.

Drenicasit kaluan në epërsi vetëm pas 10 minutave lojë.

Ishte mesfushori qendror, Taulant Dajaku që realizoi golin e parë në ndeshje për 1-0.

Në minutat e fundit të pjesës së parë, kuqezinjtë nga Skenderaj realizuan edhe dy gola të tjerë.

Mesfushori anësorë, Genc Hamiti realizoi dy gola për dy minuta.

Fillimisht Hamiti shënoi në minutën e 43 dhe golin e tretë për vendasit e realizoi pas dy minutave.

Me epërsinë e thellë 3-0 për vendasit përfunduan 45 minutat e para të ndeshjes.

Edhe në pjesën e dytë drenicasit dominuan duke arritur të shënojnë edhe një super gol.

Ishte minuta e 73-të e ndeshjes, kur mesfushori Hysen Tahiri realizoi një gol të bukur nga gjuajtja e lirë për 4-0.

Mysafirët golin e vetëm në ndeshje arritën të shënojnë 10 minuta para fundit, kur shënoi kapiteni i vendasve Sami Geci në portën e tij.

Fitorja Drenicën e ngritë në pozitën e tetë me shtatë pikë, ndërkohë Flamurtari mbetët pa fitore në pozitën e fundit me vetëm dy pikë pas gjashtë javëve.

Ndeshjen e radhës Drenica do ta zhvilloj në Prizren përballë Lirisë, ndërsa Flamurtari në shtëpi pret Vllazninë e Pozhoranit. /Telegrafi/