Feronikeli i pandalshëm fiton edhe ndaj Ballkanit

Feronikeli ka marrë një fitore të madhe në udhëtim te Ballkani 0-1.

Ndeshja filloi me vendasit që kërkonin golin e epërsisë qysh në minutat e para.

Jetmir Topalli ishte i pari që rrezikoi, por goditjen e tij për mrekulli e ndali Smakiqi i mysafirëve.

Therandasit rrezikuan edhe njëherë me kapitenin Berisha që gjuajti me kokë por vetëm pranë portës.

Në minutën e 26-të, Feronikeli gjeti edhe golin e epërsisë.

Astrit Fazliu harkoi bukur në zonë ndërsa me kokë shënoi Kastriot Rexha për 0-1.

Rexha kishte edhe një mundësi të shënonte në pjesën e parë, por goditja e tij u ndal nga shtylla pingule.

Me epërsinë 0-1 të industrialistëve përfunduan 45 minutat e para të kësaj sfide.

Ballkani në pjesën e dytë u vërsul drejt portës së mysafirëve duke kërkuar golin e barazimit.

Jetmir Topalli dhe Leart Emini patën raste të mira shënimi, por që nuk ia arritën të shënonin në minutat 50 e 57.

Deri në fund nuk pati ndonjë rast tjetër dhe Feronikeli arkëtoi tri pikë të arta nga ky udhëtim.

Skuadra e Zekirija Ramadanit vazhdon të kryesoj në Superligë me 32 pikë të tubuara pas 14 javëve.

Ndeshjen e radhës Feronikeli do ta luaj në shtëpi përballë Prishtinës, ndeshje e mbetur nga java e 10-të.

Në anën tjetër Ballkani në fundjavën e ardhshme luan në udhëtim te Prishtina. /Telegrafi/