Dimitrov: Franca dhe Ballkani luftojnë për vlerat e njëjta

Ministri i Punëve të Jashtme Nikolla Dimitrov, para fillimit të mbledhjes ministrore me BE-në në Helsinki, porositi se është më mirë të flitet për kompletimin e BE-së, në vend se për zgjerimin e saj.

I pyetur për “kundërshtimin” e Francës për fillimin e negociatave me Maqedoninë e Veriut dhe Shqipërinë, Dimitrov tha se sipas informatave të tij, Parisi ende nuk ka marrë pozitë për këtë çështje dhe se për disa ditë do të udhëtojë në Francë në takime, përcjell Telegrafi Maqedoni.

“Nuk duhet të flasim për zgjerim, por për kompletim, pasi që rajoni tërësisht është i rrethuar me vende anëtare të BE-së, karta e Evropës do të mbetet e njëjtë pasi këto vende të anëtarësohen, nuk do të zgjerohet, dhe nëse e bëjmë siç duhet, të gjithë do të jemi fitues, ajo për çka lufton Makron në BE është ajo për çka ne luftojmë në rajon, luftojmë për vlerat e njëjta”, deklaroi Dimitrov në Helsinki.

Ministri përkujtoi se procesi i zgjerimit bazohet në merita individuale dhe se nuk duhet të flitet për pako të vendeve, siç është rast për Maqedoninë e Veriut dhe Shqipërinë.

“Më së miri është të dy vendet, dy vendet është më mirë se një, por një është më mirë se asnjë, e ne nuk e kemi luksin që ta lëshojmë mundësinë për sukses”, porositi ministri para fillimit të mbledhjes./Telegrafi/