“Derbi i mbijetesës” përfundon baras, Dukagjini dhe Malisheva ndajnë pikët

Dukagjini dhe Malisheva kanë luajtur baras 0-0 në ndeshjen e parë të javës së 27-të në BKT Superligën e Kosovës.

“Derbi i mbijetesës” i zhvilluar në stadiumin “18 qershori” në Klina ka qenë shumë i luftuar nga të dyja skuadrat, por pa sjell fitues.

Pjesa e parë e ndeshjes u karakterizua me lojë thuajse të barabartë nga të dyja skuadrat, të cilat kërkonin golin e epërsisë, por pa arritur t’i ndryshojnë shifrat.

Dukagjini pati një rast ideal në minutën e 27-të duke goditur shtyllën, ndërsa në minutat shtesë pati një rast të diskutueshëm, por gjyqtari Mervan Bejtuallu ndëshkoi Hasan Hysenin me të verdhë për simulim, edhe pas rishikimit të VAR-it.

Në pjesën e dytë, përsëri u zhvillua lojë e barabartë, e fortë nga të dyja skuadrat, por edhe me ndërhyrje dhe karton për të dyja skuadrat.

Megjithatë, as në këtë pjesë skuadrat nuk arritën ta gjejnë golin dhe ndeshja u mbyll me barazim 0-0.

Pas këtij barazimi, Malisheva mbetet e pesta me 34 pikë, ndërsa Dukagjini zë vendin e tetë me 30 pikë.

Në ndeshjen e ardhshme, klinasit luajnë ndaj Ballkanit, ndërsa Malisheva ndaj Prishtinës. /Telegrafi/