Deklarata e Miroslav Lajçak për ndryshimin e Kushtetutës nxit reagime të forta në Kosovë

Pasi përfundoi vizitën në Prishtinë, i dërguari i Bashkimit Evropian për dialogun Kosovë-Serbi, Miroslav Lajcak shkoi në Beograd. Por, sa i përket formimit të asociacionit të komunave me shumicë serbe, diplomati sllovak nuk dha qëndrim të njëjtë në të dy vendet.

“Nuk do të ketë marrëveshje pa asociacion. Kosova ka bërë këtë marrëveshje dhe Kuvendi e ka ratifikuar dhe Kosova duhet ta implementojë këtë marrëveshje. Është pjesë e procesit, pjesë e negocimit dhe pjesë e dialogut. Kështu që kur politikanët thonë se kjo është e mbyllur dmth që nuk duan ta rihapin përmbajtjen dhe ne nuk po e kërkojmë këtë. Por kërkojmë të implementohet ajo që është nënshkruar”, tha Lajçak.

Por, kur shkoi në Beograd dhe u pyet për formimi e asociacionit në bazë të Kushtetutës së Kosovës, ai deklaroi “kushtetuta nuk është bibël dhe se ajo mund të ndryshohet’.

“Nëse më lejohet, para ardhjes sime Prishtinë kishte shumë deklarata të ndryshme, por atje i kisha rreth 25 takime dhe askush nga bashkëbiseduesit nuk tha që nuk duan të përmbushin premtimet. Përkundrazi të gjithë janë të interesuar të mbajnë fjalët e asociacioni të themelohet. Sa i përket kushtetutës, ka gjëra aq të komplikuara saqë ka gjasa edhe kushtetuta të ndryshohet edhe askush nuk ka thënë se kjo nuk mund të ndodhë. Kushtetuta nuk është bibël”, shtoi ai.

Por, në Kosovë nuk pajtohen me Miroslav Lajçak dhe deklaratën e tij për ndryshime kushtetuese në formimin e asociacionit. Kryetarja e Kuvendit, Vjosa Osmani deklaroi se i ka theksuar të dërguarit të BE-së se duhet të respektohet Kushtetuta e Kosovës në formimin e asociacionit.

“Nuk ka shumicë as për ndryshim të kushtetutës prandaj unë nuk e di se çfarë realiteti paralel tenton të prezantojë z. Lajcak, sepse realiteti i vërtetë është krejt i kundërt me atë në Serbi, dhe besoj, që kështu nuk është rruga përpara për të arritur konsensus për çfarëdo çështje”,  theksoi Vjosa Osmani.

Me deklaratat e Lajçak nuk pajtohet as nënkryetarja e Kuvendit, Arbërie Nagavci, e partisë opozitare Vetëvendosje. Madje ajo thotë që tema e asociacionit nuk është hapur fare në takimin e Lajcak me Albin Kurtin.

“Deklaratat e tilla janë shqetësuese. E vërteta është që pas vendimit të Gjykatës Kushtetuese tema e asociacionit duhet të jetë çështje e mbyllur dhe në fakt është çështje e mbyllur për të gjithë. Sa i përket ndryshimeve kushtetuese, ndryshimet kushtetuese do të duhej t’i bënte Republika e Serbisë për shkak të largimit të Kosovës nga Kushtetuta e saj”, theksoi ajo.

Deklaratë të pavend e quan deklaratën e emisarit evropian edhe deputeti i partisë tjetër opozitare, PDK, Gazmend Bytyqi.

“Deklaratë krejtësisht e pavend, diçka që nga institucionet tona as që duhet të merret parasysh. Po flasim për ndryshimin e kushtetutës për një asociacion të komunave, që ne e konsiderojmë shumë të dëmshëm nëse ai ka kompetenca ekzekutive”, u shpreh Bytyçi.

Njësoj mendon dhe deputetja e partisë në koalicionin Qeverisës, AAK, Time Kadriaj.

“Unë mendoj që nuk është një deklaratë e duhur kjo që e ka bërë z. Lajcak, sepse tjetër qëndrim dhe veprim kishte në Kosovë dhe në takimet me liderët politik…. mundet të ketë asociacion, por vetëm sipas verdiktit të Gjykatës Kushtetuese”, shtoi deputetja.

Në lidhje me këtë temë, Euronews Albania ka dërguar pyetje në Zyrën e Kryeministrit, por ende nuk ka marrë përgjigje.

Sa i përket kësaj teme nuk ka ende asnjë reagim nga Qeveria e Kosovës.