Biden premton sisteme të tjera të mbrojtjes ajrore dhe këmbëngul se “Ukraina mund dhe do ta ndalojë Putinin”

Joe Biden ka premtuar më shumë mbështetje për Ukrainën – duke përfshirë sistemet e mbrojtjes ajrore – teksa mirëpriti vendet anëtare të NATO-s në një samit në Uashington që shënon 75 vjetorin e organizatës.

I pushtuar nga thashethemet për shëndetin e tij, presidenti i SHBA mbajti një fjalim të fortë dhe të vendosur në të cilin ai këmbënguli se blloku ishte “më i fuqishëm se kurrë”, shkruan Sky News, përcjell Telegrafi.

Fjalimi erdhi me intensifikimin e pushtimit rus të Ukrainës dhe deklaratave të rivalit presidencial të zotit Biden, Donald Trump, i cili ka lënë të kuptohet SHBA do të largohej nga NATO nëse ai fiton zgjedhjet e nëntorit.

“Putini nuk dëshiron asgjë më pak, asgjë më pak, sesa nënshtrimin total të Ukrainës… dhe ta fshijë Ukrainën nga harta”, citohet të ketë thënë Biden.

“Ukraina mund dhe do ta ndalë Putinin”, ka shtuar ai.

Siç vë në pah Sky News, pjesa qendrore e samitit të NATO-s do të jenë premtimet e reja për ndihmë ushtarake dhe humanitare për Ukrainën.

Biden dhe liderët e Gjermanisë, Italisë, Holandës dhe Rumanisë kanë premtuar pesë sisteme shtesë të mbrojtjes ajrore Patriot dhe strategjike të tjera për të mbrojtur qytetet, civilët dhe ushtarët ukrainas.

Aleatët e tjerë, përfshirë Kanadanë, Norvegjinë, Spanjën dhe Mbretërinë e Bashkuar do të ofrojnë sisteme të tjera që synojnë përmirësimin e mbrojtjes së Ukrainës.

“Ky është një moment kyç për Evropën dhe komunitetin transatlantik, dhe unë mund ta shtoj në botë”, shtoi zoti Biden.

Presidenti ukrainas Volodymyr Zelensky mbërriti në Uashington të martën dhe tha se do të “luftonte” për NATO-n për të forcuar mbrojtjen ajrore të Ukrainës dhe për ta pajisur atë me më shumë avionë luftarakë F-16.

Në një fjalim në Institutin Reagan ai tha se duhet të ndërmerren veprime vendimtare përpara zgjedhjeve presidenciale të SHBA në nëntor për të zmbrapsur ofensivën e Rusisë kundër vendit të tij. /Telegrafi/