Arrestohet një person nën dyshimin se rekrutoi, strehoi dhe i shfrytëzoi për punë të detyruar shtatë viktima

Policia e Kosovës ka njoftuar se ka arrestuar një person nën dyshimin se ka rekrutuar, strehuar dhe shfrytëzuar për punë të detyruar shtatë viktima.

Në njoftim thuhet se “Sektori Qendror i Hetimeve nga Drejtoria për Hetimin Trafikimit me Qenie Njerëzore, gjate veprimeve hetimore në koordinim me Prokurorinë Themelore në Prishtinë Departamenti për të Mitur, me datë 21.07.2020, ka arrestuar një person të dyshuar, për veprën penale ‘Trafikim me njerëz’, i cili dyshohet se ka rekrutuar, strehuar, transportuar dhe i ka mbajtur nën kontroll  shtatë viktima të mitur (meshkuj/kosovar) duke i shfrytëzuar për punë të detyruar”.

Policia bën të ditur se gjatë realizimit të këtij plani për arrestimin e të dyshuarit si prova janë konfiskuar përkohësisht një telefon mobil dhe dy fletore të evidencave.

Në njoftim thuhet se viktimat e mitura janë trajtuar sipas Proceduarve Standarde të Veprimit për Viktima të trafikimit, ndërsa me vendim te Prokurorit kujdestar i dyshuari është dërguar në ndalim për 48 orë, për procedura të mëtejme ligjore./Telegrafi/