“Armëpushimi vetëm do t’i jap kohë forcave të Ukrainës” – a po e refuzon Rusia marrëveshjen?

Ndihmësi kryesor i presidentit rus Vladimir Putin për politikën e jashtme tha se ai i kishte thënë Uashingtonit se një armëpushim 30-ditor i propozuar nga SHBA për të ndalur luftën në Ukrainë thjesht do t’u jepte një afat forcave të Kievit.

Përparimet e Rusisë përgjatë frontit në muajt e fundit dhe përpjekja e presidentit të SHBA-së, Donald Trump për të arritur një marrëveshje paqeje për t’i dhënë fund konfliktit tre-vjeçar në Ukrainë, kanë ngritur frikën se Kievi, i cili mbështetej nga Perëndimi, mund ta humbiste luftën.

Bëhet e ditur se i dërguari special i Trumpit për Lindjen e Mesme, Steve Witkoff, ka mbërritur në Moskë për t’u takuar me Putinin, shkruan Reuters, përcjell Telegrafi.

Zyrtarët rusë thanë se Këshilltari i Sigurisë Kombëtare i SHBA-së, Mike Waltz, kishte dhënë detaje mbi idenë e armëpushimit të mërkurën dhe Rusia ishte gati për ta diskutuar atë.

Trump shpreson se Kremlini do të pajtohet me propozimin e SHBA-së për një armëpushim 30-ditor që Ukraina tha se do ta mbështeste.

Ndërkohë, Yuri Ushakov, një ish-ambasador në Uashington, i cili flet në emër të Putinit për çështjet kryesore të politikës së jashtme, tha se ai kishte folur me Waltz.

“Kam deklaruar qëndrimin tonë se ky nuk është gjë tjetër veçse një pushim i përkohshëm për ushtrinë ukrainase, asgjë më shumë”, tha Ushakov.

“Qëllimi ynë është një zgjidhje paqësore afatgjatë që merr parasysh interesat legjitime të vendit tonë dhe shqetësimet tona. Më duket se askush nuk ka nevojë për ndonjë hap që thjesht imiton veprime paqësore në këtë situatë”, shtoi ai.

Ushakov tha se Putini do të flasë me media më vonë dhe do të përshkruajë pozicionin e Rusisë në më shumë detaje. /Telegrafi/