Aksidenti i KFOR-it në Fushë Kosovë, bëri që mbi 20 udhëtarë të humbasin fluturimin në Aeroportin “Adem Jashari”

Magjistralja Prishtinë –  Pejë rreth 3 orë ka mbetur e bllokuar si pasojë e një aksidenti rrugor që ka ndodhur në mes të një veture të KFOR-it dhe një civile mbi urën e Hencit rreth orës 17 e 30.

E gjithë kjo solli shumë probleme për qytetarët të cilët kishin planifikuar të udhëtonin nga Aeroporti Adem Jashari.

Një udhëtar i ka thënë Telegrafit se, mbi 20 udhëtarë nuk kanë mundur të arrijnë me kohë në Aeroport, duke bërë kështu që të iu ikë fluturimi.

Udhëtarët i janë ankuar kompanisë EasyJet, pasi kishin paguar biletat për të udhëtar drejt Zvicrës.

Sipas tyre, kompania EasyJet nuk ka toleruar 5 minuta pritje që të bëhet “check-in”, duke bërë kështu që udhëtarët të mos fluturojnë për Zvicër.

Acarimet e udhëtarëve me punonjësit e kompanisë, ka bërë që të ndërhyjë policia.

“Disa minuta nuk keni pritur të bënim Check-in. Turp duhet me ju ardhë, marre nga kompania juaj”, ka thënë Agon Gegaj.

Lidhur me këtë Telegrafi ka tentuar të komunikojë me zyrtarët e aeroportit, por nuk ka mundur të marrë përgjigje./Telegrafi