Abdixhiku, kryeministrit: Sqarojeni a është e mirë marrëveshja me Serbinë, po apo jo sepse dy nuk ka

Kryetari i Lidhjes Demokratike të Kosovës (LDK), Lumir Abdixhiku, kërkoi sot nga kryeministri Albin Kurti të sqarojë para qytetarëve nëse marrëveshja për energjinë e nënshkruar me Serbinë në Bruksel, është e mirë apo jo.

Në seancën e sotme të Kuvendit, Abdixhiku tha se nëse marrëveshja nuk është e mirë, atëherë duhet të flitet për legalizimin e Serbisë në veriun e Kosovës.

“Pra, duhet të qartësosh një element bazik, cila është natyra e marrëveshjes, sepse të dyja s’mund të jenë. Është kundërthënie politike, s’mund të sillesh as mish as peshk. Ose e mirë ose e keqe, ose është trashëgimi ose është meritë e jotja”.

“Të dyja s’janë. Dhe në qoftë se është dëm, e s’është vazhdimësi, atëherë pse na e sjelle elektroseverin në Kosovë, të cilën e ke kundërshtuar para 4 viteve këtu në këtë foltore. Për neve, marrëveshja është e njëjtë, siç ka qenë e mirë atëherë, është edhe tani, prandaj, edhe e mbështesim, po shtrihet sovraniteti në veri”, tha Abdixhiku.

Deputeti Abdixhiku në këtë seancë kujtoi fjalët e shkrimtarit, Shkreli, të lexuara në këtë Kuvend nga ish-deputeti Adem Mikullvci.

“Më 2017, në këtë kuvend, një burrë i madh, anëtari i VV-së që kryesonte kuvendin, Adem Mikullovci, kishte nisë me fjalë të Shkrelit. ‘Nëse takohemi me veten sy më sy, a kemi me u puthë, a kemi me u pështyrë”. Çfarë kishte bërë Albin Kurti i 2015-së këtij Albin Kurtit sot. Kjo është pyetja”, u shpreh i pari i LDK-së. /Telegrafi/