KEK lidhë kontratat për import të energjisë

Korporata Energjetike e Kosovës (KEK) ka njoftuar se ka lidhur kontratat me katër kompani për importin e energjisë elektrike për periudhën kohore tetor 2008-31 mars 2009, të cilat janë rreth 4 milionë euro më të ulëta se sa ato që kishin rezultuar me anë të tenderit të hapur.

“Çmimet sillen nga 119 euro në 132 euro për megavat, ndërsa çmimet e bursës për energji elektrike të enjten kanë qenë dukshëm më të shtrenjta duke u sjellë nga 131 euro deri në 152 euro për megavat”, thuhet në një njoftim zyrtar të KEK-ut.

Importi i siguruar nga KEK është për dy lloje të energjisë, atë të moduluar (e cila paraqet import konstant gjatë 24 orëve të ditës) dhe është lidhur kontratë me kompanitë Espada dhe EGL dhe energji në kohë të pikut, kur kërkesa për energji elektrike është më e larta e që është lidhur kontratë me kompanitë Rudnap dhe EFT.

Importi i energjisë elektrike i siguruar përmes këtyre kontratave do të shërbejë për një furnizim më stabil me energji elektrike gjatë periudhës së dimrit 2008/09, kur është e pamundur të prodhohet në Kosovë e tërë energjia elektrike që kërkohet nga konsumatorët