Uji magjik i Dobërqanit

Kadri Krasniqi nga Prishtina, çdo javë e merr rrugën për fshatin Dobërqan të komunës së Gjilanit. Në këtë fshat ai nuk ka asnjë të afërm për ta vizituar. Por, arsyeja e shkuarjes atje është uji që buron në hyrje të këtij fshati. Aty e ka gjetur “melhemin” e sëmundjes së tij. Krasniqi pretendon se ky ujë ka ndikuar në përmirësimin e sëmundjes nga e cila ka vuajtur për vjet të tëra.

“Kam pas probleme me lukth dhe një mik i imi më pati treguar se në fshatin Dobërqan ekziston një krua për te cilin flitej se kishte efektet shëruese”, rrëfen Krasniqi për gazetën Tribuna.

Ai thotë se edhe pse nuk kishe besuar shumë në atë që i ishte thënë, një te shtune kishte marrë rrugën për këtë fshat.

"Fillimisht nuk pata vërejtur ndonjë ndryshim, mirëpo vendosa ta përdorë për një kohë dhe me kalimin e kohës kam pasur sukses”, tregon ai.

Krasniqi thotë se djegësimin që ka pasur në lukth më nuk e ndjen.

Se ky ujë mund të jetë shërues, tregojnë edhe banorët e Doberqanit. Ata pretendojnë se ujë që buron në këtë fshat ka efekte shëruese për disa sëmundje. /Tribuna/