Inteligjenca artificiale që rivalizon plotësisht njerëzit do të arrijë në pesë deri në dhjetë vjet

Përpara se sistemet e inteligjencës artificiale të arrijnë nivelin njerëzor, ka ende shumë punë kërkimore për t’u bërë.

Inteligjenca artificiale që mund të rivalizojë njerëzit në të gjitha segmentet është ende larg, por është vetëm çështje kohe para se të bëhet realitet, tha CEO i DeepMind, Demis Hasabis.

Ai mendon se inteligjenca e përgjithshme artificiale (AGI), e cila është më e zgjuar se njerëzit, do të fillojë të shfaqet në pesë ose 10 vitet e ardhshme, transmeton Telegrafi.

“Mendoj se sistemet e sotme janë shumë pasive dhe ka ende shumë që nuk mund të bëjnë, por besoj se në vitet e ardhshme shumë nga ato aftësi do të fillojnë të dalin në pah dhe ne do të shkojmë drejt diçkaje që e quajmë inteligjencë të përgjithshme artificiale”, tha njeriu i parë i kompanisë britanike që merret me inteligjencën artificiale.

Ai e përkufizoi AGI si “një sistem që është në gjendje të shfaqë të gjitha aftësitë e ndërlikuara që njerëzit mund të bëjnë”.

“Ne nuk e kemi arritur ende atë nivel, megjithëse këto sisteme janë shumë mbresëlënëse në disa gjëra, por ka të tjera që ata nuk mund t’i bëjnë ende, dhe ne kemi shumë punë kërkimore për të bërë përpara kësaj”, tha Hassabis.

Ai nuk është i vetmi që beson se do të duhet pak kohë që të shfaqet AGI.

Vitin e kaluar, CEO i gjigantit të teknologjisë kineze Baidu, Robin Li, tha se e sheh se duhen më shumë se 10 vjet për të arritur inteligjencën e përgjithshme artificiale, duke hedhur poshtë parashikimet optimiste të disa prej kolegëve të tij se një përparim i tillë do të bëhej në një kornizë kohore shumë më të shkurtër.

Parashikimi i Hassabis, megjithatë, shkurton afatin kohor për arritjen e niveleve të përfaqësuara nga AGI në krahasim me parashikimet e kolegëve të saj të industrisë.

Në Forumin Ekonomik Botëror në Davos, Zvicër, në janar, CEO i startup-it Antropik, Dario Amodei njoftoi një formë të inteligjencës artificiale, e cila është “më e mirë se pothuajse të gjithë njerëzit në pothuajse të gjitha detyrat dhe duhet të shfaqet në dy ose tre vitet e ardhshme”. /Telegrafi/