Canaj: Më pengoi shumë, dëgjova se askush nga familja Jashari nuk ishte në varrimin e babait të Thaçit

Profesori universitar dhe ish-diplomati, Blerim Canaj ka thënë se krerët e shtetit do duhej të merrnin pjesë në varrimin e Haxhi Thaçit, babait të ish-presidentit Hashim Thaçi. Ai gjithashtu tha se e ka penguar që askush nga familja Jashari nuk ishte në varrim.

Canaj ka thënë se prezenca e tyre do të përçonte një mesazh të bashkimit tek qytetarët.

Ish-diplomati  Canaj ka thënë se Hashim Thaçi është figurë historike dhe se kryeministri Kurtit dhe krerët tjerë institucionalë do të duhej të merrnin pjesë në varrim.

“Nëse flasim për Hashim Thacin, flasim për një figurë historike. Dhe meqë, Hashim Thaçi nuk është këtu, do të duhej që Albin Kurti të merrte pjesë në varrimin e Haxhi Thaçit. Nuk e di pse s’ka qenë, por mendoj se do të duhej të ishte”, ka thënë Canaj në Tëvë1.

Canaj tha se nga ajo që ka dëgjuar në varrim nuk kishte as pjesëtarë të familjes Jashari, gjë e cila tha se e pengoi.

“Diçka që më pengoi aq shumë, dëgjova se askush nga familja Jashari nuk ishte aty. Do duhej të ishin së paku si bashkëvendës do duhej të ishte. Dhe do të ishte një mesazh i bashkimit. Mendoj se do duhej të ishin. Do duhej të ishte dhe kryetari i Kuvendit dhe presidentja. Do të ishte një mesazh tepër i mirë për qytetarët sikur të ishin ata aty”, tha Canaj.

Hashim Thaçit, Gjykata Speciale nuk i lejoi pjesëmarrjen në varrimin e babait të tij. Ky vendim është kritikuar në Kosovë duke e vlerësuar si shkelje të drejtave të njeriut.

Presidentja Osmani, kryetari i Kuvendit dhe kryeministri kanë shprehur ngushëllime për vdekjen e Haxhi Thaçit.