MKRS: Komuna s’mori leje për punimet në zonën ku ka asete kulturore

Ministria e Kulturës, Rinisë dhe Sportit (MKRS) ka njoftuar se janë vendosur shenjat zyrtare për ndalimin e punimeve në rrugën “Xhorxh Bush” në Prishtinë, për shkak të ndërhyrjeve të paautorizuara në një zonë të mbrojtur të trashëgimisë kulturore.

Sipas MKRS-së, Inspektorati për Trashëgimi Kulturore ka pranuar informacion për punime në këtë zonë, e cila gjendet brenda Qendrës Historike të Prishtinës.

Pas verifikimeve nga QRTK Prishtina dhe IKMM, është konstatuar se Komuna e Prishtinës dhe drejtoritë e saj përkatëse nuk kanë kërkuar leje për kryerjen e këtyre punimeve, siç kërkohet me ligj.

Më 12 mars 2025, Drejtori i Inspektoratit për Trashëgimi Kulturore, Imer Hakaj, së bashku me inspektorët përkatës, kanë zhvilluar një takim me përfaqësuesit e Komunës së Prishtinës dhe institucioneve të trashëgimisë kulturore për të diskutuar situatën.

Lexo po ashtu Ndalimi i punimeve në sheshin “Xhorxh Bush” – Komuna e Prishtinës: Vendim me prapavijë politike

Pas këtij takimi, në prani të drejtorit për transformim të Komunës së Prishtinës, Gëzim Kastrati, janë vendosur shenjat zyrtare për ndalimin e punimeve.

Kastrati ka nënshkruar procesverbalin për ndalim të punimeve dhe është zotuar se do të ndjekin procedurat për marrjen e miratimeve të nevojshme sipas legjislacionit në fuqi.

MKRS ka theksuar se Inspektorati për Trashëgimi Kulturore dhe institucionet përkatëse do të mbajnë publikun të informuar mbi veprimet e mëtejshme lidhur me këtë çështje.