Lazio i shkakton Milanit humbjen e tretë radhazi në kampionat

Milani ka pësuar humbje me rezultat 2-1 në shtëpi ndaj Lazios në kuadër të javës së 27-të në elitën e futbollit italian. 

Mysafirët rastin e parë në këtë ndeshje e patën në minutën e tretë përmes Boulaye Dia, por gjuajtjen e tij e ndali për mrekulli Mike Maignan. 

Një tjetër rast të mirë për mysafirët e pati edhe Gustav Isaksen në minutën e 12-të, gjuajta e të cilit përfundoi shumë pranë shtyllës së djathtë. 

Rasti i parë serioz për Milanin erdhi në minutën e 19-të përmes Tijjani Reijnders, por holandezit golin ia mohoi Ivan Provedel. 

Pas disa tentimeve të njëpasnjëshme, Lazio e gjeti golin e avantazhit në minutën e 28-të përmes Mattia Zaccagnit i cili realizoi për 1-0 pas një topi të kthyer. 

Në minutën e 57-të për t’i vështirësuar edhe më shumë punët Milanit u përkujdes Strahinja Pavlovic i cili u ndëshkua me karton të kuq. 

Sidoqoftë, ky karton nuk e zmbrapsi Milanin të cilët megjithatë ia dolën të barazojnë shifrat në 1-1 përmes Samuel Chukëuezes në minutën e 85-të. 

Kur dukej se ndeshja do përfundonte me rezultat të barbartë, Maignan shkaktoi penallti në minutën e 94-të, duke bërë që Pedro të realizojë nga pika e bardhë për 2-1. 

Pas kësaj humbje Milani shkon në kuotën e 41 pikëve dhe mban pozitën e nëntë në renditje, teksa Lazio ka 50 sosh dhe gjendet në pozitën e katërt./Telegrafi/