Këto janë skicat e para të një veture të vogël elektrike Volkswagen

Volkswagen do të prezantojë muajin e ardhshëm konceptin e modelit elektrik fillestar, i cili pritet të hyjë në prodhim në vitin 2027.

Me këtë model, Volkswagen synon të ulë kostot dhe të ofrojë një veturë që do të tërheqë një audiencë të gjerë. Megjithatë, kompania aktualisht po e mban projektin mjaft sekret.

Volkswagen ka konfirmuar se modeli i ri fillestar do të prodhohet në Evropë dhe është krijuar posaçërisht për tregun evropian, me një çmim të synuar prej 20 mijë eurosh.

Koncepti do të quhet Volkswagen ID. Every1, duke reflektuar strategjinë e kompanisë për ta bërë elektromobilitetin të qasshëm për të gjithë.

Ky automjet i vogël elektrik do të bazohet në një version të përmirësuar të platformës MEB, e cila përdoret në modelet aktuale elektrike të Volkswagenit.

Duke pasur parasysh që ID. 2all – një tjetër koncept i Volkswagen – ka një gjatësi prej 405 cm, mund të supozojmë se ID. Every1 do të jetë edhe më kompakt. Për krahasim, Volkswagen e-Up, një nga modelet e vogla elektrike të markës, ishte vetëm 3.5 metra i gjatë.

Për të kompensuar përmasat e vogla, Volkswagen duhet të jetë kreativ në organizimin e hapësirës. Heqja e motorëve të mëdhenj me djegie të brendshme dhe sistemeve ndihmëse të tyre do ta lehtësojë këtë detyrë.

Sa i përket dizajnit, skicat e publikuara tregojnë një automjet kompakt dhe funksional.

Mbetet për t’u parë nëse Volkswagen ID. Every1 do të arrijë të justifikojë emrin e tij dhe të bëhet një model i rëndësishëm për të ardhmen e Volkswagen-it në tregun e veturave elektrike. /Telegrafi/