Egjipti dhe Jordania theksojnë ‘unitetin’ për Gazën, bëjnë thirrje për rindërtim pa zhvendosje

Presidenti egjiptian Abdel Fattah al-Sisi dhe mbreti i Jordanisë Abdullah II theksuan të mërkurën “unitetin” e pozicioneve të vendeve të tyre në Gaza, një ditë pasi presidenti i SHBA-së, Donald Trump zhvilloi bisedime me monarkun jordanez në Uashington.

“Të dy liderët pohuan unitetin e pozicioneve egjiptiane dhe jordaneze”, për rindërtimin e Rripit të Gazës të shkatërruar nga lufta, “pa zhvendosur popullin palestinez nga toka e tyre”, thuhet në një deklaratë nga presidenca egjiptiane, shkruajnë mediat e huaja, përcjell Telegrafi.

Një deklaratë tjetër nga oborri mbretëror jordanez tha se të dy liderët theksuan “pozicionin e tyre të përbashkët” duke refuzuar zhvendosjen e detyruar të palestinezëve.

Të dyja deklaratat iu referuan gjithashtu gatishmërisë së tyre për të “bashkëpunuar” me Trump për të arritur “paqe të drejtë dhe të qëndrueshme” në Lindjen e Mesme.

Egjipti dhe Jordania kanë qenë në ballë të një reagimi të ashpër arab kundër një plani të Trump për të zhvendosur palestinezët nga Gaza në të dy vendet.

Deklaratat e Trump janë shoqëruar me një sugjerim se ai mund të ndalojë “në mënyrë të mundshme” ndihmën për të dy vendet nëse ata refuzojnë të pranojnë palestinezët.

Pas bisedimeve të tij me Trump në Uashington të martën, Mbreti Abdullah II tha se vendi i tij mbetet “i palëkundur” në pozicionin e tij kundër zhvendosjes së detyruar të palestinezëve në Gaza dhe Bregun Perëndimor.

“Ky është qëndrimi i unifikuar arab”, shkroi Abdullah në mediat sociale.

Ndërkohë Egjipti njoftoi këtë javë se do të presë një samit të kombeve arabe më vonë këtë muaj.

Ky vend tha gjithashtu se do të paraqiste një “vizion gjithëpërfshirës” për rindërtimin e Gazës në një mënyrë që siguron që palestinezët të mbeten në tokën e tyre.

Egjipti dhe Jordania, të dy aleatë kryesorë të SHBA-së, varen shumë nga ndihma e huaj dhe SHBA-ja konsiderohet si një nga donatorët e tyre kryesorë. /Telegrafi/