LDK në Viti thotë se aktivistët e LVV-së sulmuan asamblistin Ilir Zuka, Policia: Rasti nuk ndërlidhet me procesin zgjedhor

Lidhja Demokratike e Kosovës dega në Viti, përmes një njoftimi ka thënë se është sulmuar këshilltari komunal Ilir Zuka.

LDK ka fajësuar për këtë rast aktivistët e Lëvizjes Vetëvendosje.

“Dega e Lidhjes Demokratike të Kosovës në Viti dënon ashpër sulmin fizik ndaj këshilltarit komunal, z. Ilir Zuka, nga aktivistët e Lëvizjes Vetëvendosje në Pozheran. Ky akt i shëmtuar dhe i papranueshëm është sulm ndaj vlerave demokratike dhe lirisë së shprehjes. I bëjmë thirrje organeve të rendit që të ndërmarrin menjëherë masa dhe të vënë para drejtësisë autorët e këtij akti të shëmtuar. Dhuna nuk ka vend në shoqërinë tonë dhe as në jetën publike”, thuhet në reagimin e LDK-së.

Lidhur me këtë rast Telegrafi ka kontaktuar me policinë në rajonin e Gjilanit. Zëdhënësi i policisë, Ismet Hashani bëri të ditur se ky rast nuk ndërlidhet me procesin zgjedhor.

“Rasti nuk ndërlidhet me procesin zgjedhor, ka ndodhur jashtë perimetrit të Qendrës së Votimit. Në vend ngjarje ka dalë prokurori i cili ka cilësuar rastin si “sulm” dhe ka nisur hetimet për të zbardhë motivet e këtij rasti”, tha Hashani. /Telegrafi/