Zhvendosja e banorëve të Gazës do të ishte e përkohshme, thotë Rubio

Propozimi i presidentit amerikan Donald Trump për të rivendosur popullsinë e Gazës do të ishte vetëm i përkohshëm, tha Sekretari i Shtetit, Marco Rubio.

Ai pason sugjerimin e Trump se SHBA mund të “marrë” Gazën dhe të rivendosë miliona palestinezë që jetojnë atje – një ide që ka tërhequr kritika nga OKB-ja, grupet e të drejtave të njeriut dhe udhëheqësit arabë, transmeton Telegrafi.

Zëdhënësja e Shtëpisë së Bardhë, Karoline Leavitt sqaroi më tej komentet e Trump, duke thënë se SHBA nuk po planifikonte të vendoste “çizmet në tokë” në territor.

Ndërkohë, Ministri izraelit i Mbrojtjes, Israel Katz, ka thënë se banorët e Gazës “duhet të lejohen të gëzojnë lirinë e daljes dhe imigrimit”, por dha pak detaje se si do të funksiononte kjo.

Në një udhëtim në Guatemalë, Marco Rubio tha se propozimi i Trump nuk ishte “armiqësor”, por një “lëvizje bujare”, duke treguar “gatishmërinë e Shteteve të Bashkuara për t’u bërë përgjegjëse për rindërtimin e asaj zone”.

Ai tha se ideja ishte që banorët e Gazës të largoheshin nga territori për një periudhë “të përkohshme”, ndërsa mbeturinat të pastroheshin dhe të bëhej rindërtimi.

Zëdhënësja e Shtëpisë së Bardhë, Karoline Leavitt u tha gazetarëve të mërkurën se presidenti ishte i përkushtuar për të rindërtuar Gazën, dhe për të zhvendosur “përkohësisht” banorët e saj gjatë procesit.

Trump tha të martën se zhvendosja do të ishte e përhershme.

Leavitt tha gjithashtu se presidenti nuk ishte zotuar të vendoste “çizmet në tokë” në territor, por nuk pranoi të përjashtonte përdorimin e trupave amerikane atje.

Komentet e saj vijnë pasi Donald Trump propozoi marrjen e kontrollit të Rripit të Gazës dhe rizhvillimin e tij në “Rivierën e Lindjes së Mesme”.

“SHBA do të marrë Rripin e Gazës dhe ne gjithashtu do të bëjmë një punë me të”, tha Trump të martën gjatë një konference të përbashkët shtypi me kryeministrin izraelit Benjamin Netanyahu, i cili e quajti idenë “që ia vlen t’i kushtohet vëmendje”.

Ministri izraelit i Mbrojtjes, Israel Katz, vlerësoi gjithashtu propozimin e Trump, duke shtuar se banorët e Gazës “duhet të lejohen të gëzojnë lirinë e daljes dhe imigrimit” nga toka, deti ose ajri.

Ai tha se vende si Spanja, Irlanda dhe Norvegjia – kritikë të luftës – “janë të detyruara ligjërisht të lejojnë çdo banor të Gazës të hyjë në territorin e tyre”.

Ai nuk shpjegoi se si do të funksiononte propozimi – ose nëse banorët e Gazës do të mund të ktheheshin pas rindërtimit.

Ministri i Jashtëm i Spanjës e ka hedhur poshtë sugjerimin. /Telegrafi/