Cilat shtete ballkanike po protestojnë kundër çmimeve të larta të produkteve ushqimore?

Blerësit në të gjithë Ballkanin bojkotuan supermarketet të premten si pjesë e një lëvizjeje që protestonte ndaj rritjes së çmimeve të produkteve ushqimore dhe përkeqësimit të krizës së kostos së jetesës.

Bëhet e ditur se bojkoti vjen një javë pasi konsumatorët në Kroaci qëndruan larg dyqaneve si pjesë e një nisme të nisur nga grupi kroat i të drejtave të konsumatorëve “Halo, inspektore”.

Faqja e tij në Facebook postoi disa fotografi të supermarketeve bosh në vend.

Ndërsa të enjten, grupi rriti fushatën e tij duke njoftuar një bojkot njëjavor të zinxhirëve të supermarketeve Eurospin, Lidl dhe DM dhe u bëri thirrje kroatëve të shmangin të gjitha format e tjera të shpenzimeve të premten.

Raportohet se lëvizja e protestës është shtrirë edhe në vende të tjera të Ballkanit Perëndimor – si Bosnja dhe Hercegovina, Mali i Zi dhe Serbia, shkruan euronews, përcjell Telegrafi.

Kryeministri i Malit të Zi, Milojko Spajiq, madje i është bashkuar, duke deklaruar se “si qytetar e mbështet një veprim të tillë” në një intervistë televizive me transmetuesin publik të vendit këtë javë.

Në Kroaci, përpara bojkotit të premten, qeveria shtoi 40 artikuj të tjerë në listën e saj ekzistuese të 30 produkteve bazë me çmime të kufizuara, njoftuan mediat lokale.

Lexo po ashtu Çmimet e larta të produkteve - sërish bojkotohen dyqanet në Kroaci dhe Bosnje

Këto produkte përfshijnë disa lloje djathrash, kafeje dhe gjëra të domosdoshme shtëpiake si sapuni.

“Qëllimi kryesor është të mbrohen grupet më të cenueshme të qytetarëve”, tha ministri kroat i ekonomisë Ante Susnjar, në një deklaratë të shpërndarë nga transmetuesi publik HRT.

Ndryshe, në Kroaci, transaksionet në zinxhirët e supermarketeve ranë me 44% të premten e kaluar, me shitjet totale që ranë me 53%, sipas një deklarate nga autoritetet tatimore të Kroacisë.

Kroacia është shtrydhur nga inflacioni, duke arritur një normë vjetore prej 4.5% në dhjetor – më e larta në eurozonë, ku mesatarja është 2.4%.

Vendi prezantoi për herë të parë kufijtë e çmimeve në vitin 2022 si një mënyrë për të luftuar rritjen e çmimeve të shkaktuara nga agresioni rus në Ukrainë dhe pandemia COVID-19.

Zinxhirët kroatë të supermarketeve i janë përgjigjur gjithashtu lëvizjes së protestës, me Kaufland Croatia që njoftoi një ulje çmimi për mbi 1,000 produkte nga 5 shkurti.

Një tjetër rrjet supermarketesh, Konzum, tha se planifikonte të injektonte 1 milion euro për uljen dhe ngrirjen e çmimeve për 250 produkte vendase, të cilat nuk janë të kufizuara nga qeveria. /Telegrafi/