Montenapoleone apo Fifth Avenue – rruga më e shtrenjtë në botë

Për një kohë të gjatë, rruga “Fifth Avenue” e Manhattanit, New Yorkut mbante titullin “rruga më e shtrenjtë në botë”, por së fundmi u largua nga kjo pozitë prej Montenapoleone, rrugë luksoze për blerje në Milano, Itali.

Çdo vit, kompania amerikane Cushman & Wakefield publikon një indeks global që rendit zonat më të shtrenjta për blerje në botë, sipas çmimeve të qirasë që ato kërkojnë. “Fifth Avenue” kishte qenë në vendin e parë për shumë vite mes 138 destinacioneve kryesore për shitje me pakicë në botë, por vitin e kaluar u kalua nga Montenapoleone, rruga më e njohur për blerje luksoze në Milano.

Kjo rrugë e shkurtër është jo vetëm një magnet për turistët që janë të interesuar vetëm për dritaret e dyqaneve, por tërheq edhe disa nga njerëzit më të pasur të globit, shumë prej të cilëve shpenzojnë të paktën 2500 euro për blerje, një mesatare e lartë e faturave në botë, shkruan odditycentral.

Turizmi luksoz në Milano ka pësuar një rritje të madhe në vitet e fundit, falë disa ngjarjeve të shtrenjta si dy javët e modës dhe Java e Dizajnit, dhe qyteti italian ka arritur të tërheqë edhe të pasur me banim të përhershëm, falë stimujve të mëdha fiskalë. Markat luksoze kanë ndjekur këtë trend dhe konkurrojnë ashpër për vendet më të mira për dyqane fizike. Dhe nuk ka vend më të mirë në Milano se Rruga Montenapoleone.

Ndërkohë që qiratë në Upper Fifth Avenue kanë mbetur të qëndrueshme gjatë viteve të fundit, në Montenapoleone ato janë rritur me 30 për qind dhe ekspertët presin që ato të rriten edhe më shumë. Bizneset pritet të paguajnë një mesatare prej 20 mijë eurosh për metër katror në Montenapoleone, krahasuar me 19,537 euro për metër katror.

Kjo është një pasuri, por gjigantët si Fendi, Prada, ose Versace duket se e mendojnë si një investim të vlefshëm. Markat më të mëdha në Montenapoleone thuhet se fitojnë mes 50 dhe 100 milionë euro në vit nga dyqanet e tyre fizike atje, pa përfshirë ekspozimin në marketing që ka mundësinë të arrijë dhjetëra milionë njerëz çdo vit.

Një avantazh i rëndësishëm i Via Montenapoleone në krahasim me rrugët e tjera të njohura për blerje në botë është madhësia e saj relativisht e vogël. Ajo është më pak se një çerek mile e gjatë, që do të thotë se hapësira tregtare është shumë e kufizuar dhe, për pasojë, shumë e shtrenjtë.

Ndërtesat në rrugën më të shtrenjtë të botës mund të shiten për miliarda dollarë, dhe vetëm markat më të mëdha të modës mund ta përballojnë qiranë. /Telegrafi/