Scholz dhe Macron “qëndrojnë së bashku ndërsa Evropa përgatitet të përballet me Trump”

Kancelari gjerman Olaf Scholz të mërkurën tha se Evropa “nuk do të struket” në përgjigje të kthimit të Donald Trump si president i SHBA-së.

Duke folur në Paris përpara një takimi me presidentin francez Emmanuel Macron, Scholz tha se Evropa do të jetë një “një partner konstruktiv dhe me vetëbesim” për Shtetet e Bashkuara, shkruajnë mediat e huaja, përcjell Telegrafi.

“Ne jemi të fortë, ne qëndrojmë së bashku”, tha Scholz, i cili ishte në kryeqytetin francez për të shënuar 62 vjetorin e Traktatit të Elysee.

Macron dhe Scholz pajtohen se “Evropa duhet të jetë e fortë dhe elastike në një botë që – për ta thënë më butë – është në lëvizje”, tha kancelari gjerman, duke e përshkruar mandatin e dytë të Trump si një “sfidë”.

Komenteve të tij u bëri jehonë Macron, i cili tha se të dy vendet duan të “përshpejtojnë” agjendën evropiane përballë kërcënimeve të tarifave amerikane ndaj eksporteve evropiane.

Presidenti tha se është “në dorën tonë evropianëve, dhe në këtë mënyrë të dy vendeve tona, të luajmë rolin tonë të plotë në konsolidimin e një Evrope të bashkuar, të fortë dhe sovrane”.

“Sot më shumë se kurrë, prioriteti i evropianëve duhet të jetë Evropa jonë dhe mbi të gjitha konkurrueshmëria, prosperiteti dhe siguria jonë”, shtoi ai.

Të dy vendet po bashkëpunojnë në një sërë fushash, duke përfshirë inteligjencën artificiale, tha Macron.

“Ne kemi një plan franko-gjerman për inteligjencën artificiale dhe duam të zhvillojmë së bashku më shumë projekte kërkimore, start-ups dhe rritjen e kompanive tona”.

Macron la të kuptohet për tensione në marrëdhëniet franko-gjermane në vitet e fundit, por sinjalizoi se lidhjet mbeten të forta.

“Përballë sfidave dhe shqetësimeve që lindin ndonjëherë, dyshja që formojmë është solide”. /Telegrafi/