Murtezani në Kiev: RMV dënon agresionin rus, japim mbështetje të plotë ndaj Ukrainës

 Në kuadër të vizitës së tij të punës në Ukrainë, ministri Orhan Murtezani realizoi disa takime në të cilat konfirmoi mbështetjen e Maqedonisë së Veriut për procesin euro-integrues të Ukrainës.

Siç njoftoi MÇE, Murrtezani në Ukrainë theksoi edhe harmonizimin e plotë të Republikës së Maqedonisë së Veriut me Politikën e Përbashkët të Jashtme dhe të Sigurisë të Bashkimit Evropian, e cila është bazë për orientimin tonë strategjik në lidhje me sfidat globale të sigurisë.

Murtezani gjithashtu sqaroi se me qëllim për të përforcuar rolin si partner i përgjegjshëm dhe konstruktiv në skenën ndërkombëtare, Maqedonia e Veriut, në kontekst të përkushtimit të saj në procesin e integrimeve evropiane, do të vazhdojë në mënyrë aktive të mbështesë përpjekjet e Bashkimit Evropian dhe anëtarëve të NATO-s për zgjidhje paqësore të konfliktit në Ukrainë, promovimin e stabilitetit dhe pjesëmarrjen aktive në nismat globale për avancimin e sigurisë në rajon.

Në kontekst të zhvillimeve aktuale gjeopolitike dhe sfidave të reja që dalin nga pushtimi ushtarak rus në Ukrainë, Ministri Murtezani në takim theksoi se Maqedonia e Veriut, si anëtare e NATO-s, do të harmonizojë qëndrimin e saj me strategjitë dhe vendimet që do të merren nga Aleanca.

“Ne dënojmë agresionin rus dhe japim mbështetjen tonë të plotë udhëheqësve ukrainas në përpjekjet e tyre për arritjen e paqes dhe stabilitetit në rajon së bashku me partnerët tanë të përbashkët strategjikë. Në bashkëpunim të ngushtë me aleatët tanë të NATO-s, do të vazhdojmë të angazhohemi për gjetjen e zgjidhjes së qëndrueshme që do t’i sjellë fund luftës dhe do të sigurojë paqe afatgjatë. Republika e Maqedonisë së Veriut mbetet e përkushtuar në proceset që do të çojnë drejt stabilitetit, duke mbështetur popullin ukrainas në luftën e tyre për liri dhe siguri”, ministri Murtezani.