Kongresi nuk i shqyrton kërkesat e Trumpit, votohet projektligji për buxhetin

Kongresi amerikan votoi për të shmangur mbylljen e qeverisë herët në mëngjesin e së shtunës pasi udhëheqësit republikanë të Dhomës së Përfaqësuesve hoqën dorë nga një kërkesë e Donald Trumpit lidhur me kufirin e borxhit, duke theksuar kufizimet e ndikimit të presidentit të zgjedhur në Capitol Hill, pavarësisht pozitës së tij si udhëheqës i partisë.

Dhoma votoi të premten në mbrëmje dhe Senati votoi pak pas mesnatës për të miratuar një projektligj që zgjat financimin e qeverisë deri në muajin mars dhe siguron ndihma për katastrofat dhe bujqësinë, por nuk përfshin pezullimin e kufirit të borxhit, të cilin Trumpi e kishte kërkuar nga republikanët që ta trajtonin. Presidenti Joe Biden pritet ta nënshkruajë projektligjin e përkohshëm për ta kthyer në ligj.

Lexo po ashtu Republikanët 'rebelë' i dhanë një goditje të papritur Trumpit

Trumpi trazoi përpjekjet për të parandaluar një mbyllje të qeverisë në fillim të javës duke kundërshtuar një marrëveshje fillestare dypartiake, duke lënë republikanët të përpiqeshin me nxitim për të gjetur një zgjidhje, shkruan cnn.

Si rezultat i kundërshtimit të Trumpit, republikanët e Dhomës së Përfaqësuesve rrëzuan marrëveshjen dypartiake, duke zemëruar demokratët. Dhoma e përfaqësuar nga republikanët më pas u përpoq dhe dështoi të enjten të kalonte një plan financimi të mbështetur nga Trumpi, i cili do të përfshinte një pezullim dyvjeçar të kufirit të borxhit, pasi presidenti i zgjedhur u kërkoi republikanëve të merreshin me këtë çështje.

Demokratët e kundërshtuan planin, duke argumentuar se përpjekja e republikanëve për të pezulluar kufirin e borxhit do ta ndihmonte Trumpin të kalonte planin për taksat.

Por, nuk ishin vetëm demokratët ata që votuan kundër projektligjit të mbështetur nga Trumpi. Një numër i rëndësishëm republikanësh në Dhomën e Përfaqësuesve iu bashkuan pothuajse të gjithë demokratëve për ta rrëzuar atë, duke shkaktuar një situatë kaotike 24-orëshe në Capitol Hill, ku Kongresi dukej se po shkonte drejt një mbylljeje të qeverisë.

Në një lëvizje që përfundimisht zgjidhi ngërçin, Kryetari i Dhomës së Përfaqësuesve, Mike Johnson, paraqiti të premten një projektligj të përkohshëm për financimin, i cili nuk përfshinte pezullimin e kufirit të borxhit.

Ai u miratua me 366 vota pro dhe 34 kundër. Votimi në Senat ishte 85 pro dhe 11 kundër.

Projektligji do të financojë qeverinë deri më 14 mars 2025 dhe përfshin afërsisht 100 miliardë dollarë ndihmë për katastrofat, si dhe një zgjatje të projektligjit për bujqësinë. /Telegrafi/