SHBA paralajmëron Turqinë për liderët e Hamasit

Administrata e Joe Biden ka paralajmëruar Turqinë kundër “pritjes” së anëtarëve të udhëheqjes së Hamasit, pasi dolën raporte se disa anëtarë të lartë të Hamasit u larguan nga Katari për në Ankara javën e kaluar.

I pyetur në lidhje me raportet se qeveria turke po priste udhëheqjen e krahut politik të organizatës, zëdhënësi i Departamentit të Shtetit të SHBA, Matthew Miller u tha gazetarëve të hënën se nuk ishte në gjendje të mohonte pretendimin, shkruajnë mediat e huaja, përcjell Telegrafi.

“Ne nuk besojmë se udhëheqësit e një organizate të egër terroriste duhet të jetojnë të qetë kudo”, ka thënë Miller, duke shtuar se kjo vlen veçanërisht në kryeqytetin turk – një “qytet i madh i një prej aleatëve dhe partnerëve tanë kryesorë”.

Transmetuesi publik izraelit Kan tha se anëtarët e Hamasit u nisën nga Doha në Ankara pasi qeveria e Katarit njoftoi se po largohej nga përpjekjet e saj të mëparshme për të negociuar një armëpushim midis Izraelit dhe Hamasit.

Burimet diplomatike turke kanë hedhur poshtë më parë raportet se Hamasi po zhvendos zyrën e tij politike në Turqi, duke thënë se anëtarët e grupit militant e vizitojnë rrallë këtë vend.

Ndryshe, Katari braktisi përpjekjet e tij ndërmjetësuese pas zhgënjimit në rritje me mungesën e përparimit në të dyja anët e konfliktit në Gaza.

Dy javë më parë, një zyrtar amerikan tha se administrata Biden i tha Katarit se zyra e grupit militant në Doha – e krijuar në mënyrë që përfaqësuesit e Hamasit të mund të merrnin pjesë në negociatat për një armëpushim – nuk ishte më e dobishme dhe delegacioni i Hamasit duhet të dëbohej.

Katari përsëriti se nuk kishte më një rrugë për të “negociuar një marrëveshje me mirëbesim” dhe se zyra politike e Hamasit “nuk i shërben më qëllimit të saj”.

E një zyrtar i lartë i Hamasit theksoi në atë kohë se ata ishin në dijeni të vendimit të Katarit për të pezulluar përpjekjet e ndërmjetësimit, por këmbënguli se atyre nuk u ishte thënë të largoheshin nga vendi.

Siç vënë në pah mediat, udhëheqësit e shquar të Hamasit, si Ismail Haniyeh dhe Saleh al-Arouri, dihej se kishin vizituar dhe qëndruar në Turqi përpara se të vriteshin nga ushtria izraelite.

Ndërkohë, marrëdhëniet midis Turqisë dhe Izraelit janë përkeqësuar që kur Izraeli filloi fushatën e tij ushtarake në Rripin e Gazës pas sulmeve të Hamasit në Izraelin jugor më 7 tetor 2023.

Presidenti turk Rexhep Tajip Erdogan është një kritik i zëshëm i operacionit ushtarak të Izraelit në Gaza, të cilin ai e ka cilësuar si gjenocid dhe nuk e konsideron Hamasin një organizatë terroriste.

Të mërkurën e kaluar, Erdogan tha se qeveria e tij kishte ndërprerë të gjitha lidhjet me Izraelin dhe do të “mbante këtë qëndrim në të ardhmen”. /Telegrafi/