Rrjeti i OJQ-ve: Therrja e katër personave, tejet alarmante për sigurinë publike të Ferizajt

Rrjeti i OJQ-ve në Ferizaj, AVONET ka deklaruar se therrja e katër personave është një ngjarje tejet alarmante për sigurinë publike dhe përbën një sinjal të qartë për pasigurinë publike me të cilën përballen qytetarët e kësaj komune.

“Fatkeqësisht, incidentet e ngjashme, përfshirë therrjet dhe rrahjet e vazhdueshme, kanë ndikuar thellësisht në ndjenjën e pasigurisë me të cilën përballen qytetarët”, thuhet në njoftim.

“AVONET shpreh shqetësimin e thellë për gjendjen alarmante të sigurisë publike në Ferizaj, gjendje që vë në pah mungesën e efektivitetit të akterëve lokalë përgjegjës për këtë fushë. Është për të ardhur keq që Komuna e Ferizajt nuk mban në funksion një mekanizëm të rëndësishëm për garantimin e sigurisë, siç është Këshilli Komunal për Siguri në Bashkësi -KKSB. Ky forum, i cili ka për qëllim identifikimin dhe trajtimin e çështjeve të sigurisë publike, do të duhej të ishte në qendër të bashkëpunimit mes komunitetit dhe institucioneve”, vijon njoftimi.

Lexo po ashtu Një burrë ther me thikë katër persona në Ferizaj, policia jep detaje të ngjarjes

Organizatat e shoqërisë civile thonë se roli i bashkëpunimit ndërmjet Policisë së Kosovës dhe komunitetit është thelbësor, bazuar edhe në Strategjinë për policinë në bashkësi.

“Fatkeqësisht, së fundmi ky bashkëpunim duket se është dobësuar, duke humbur efektivitetin e tij në adresimin e sfidave që përballet komuniteti”.

AVONET ngrit alarmin mbi mungesën e komunikimit mes institucioneve dhe qytetarëve, çka sipas tyre ndikon drejtpërdrejt në identifikimin dhe parandalimin e ngjarjeve të tilla tragjike.

“Kjo situatë kërkon një reagim të menjëhershëm dhe një bashkëpunim të përforcuar për të rikthyer besimin dhe sigurinë publike”, thuhet mes tjerash në reagim./Telegrafi/