Deputetët e partisë ia kërkojnë dorëheqjen kryeministrit kanadez

Justin Trudeau mori një letër të nënshkruar nga 20 deputetë të Partisë Liberale, në të cilën i kërkohet të bëjë një deklaratë të qartë nëse do të vazhdojë të udhëheqë partinë në periudhën e ardhshme.

Përfaqësuesit e Liberalëve në Parlamentin e Kanadasë, 20 prej tyre më saktë, nënshkruan një letër ku i kërkonin kryeministrit kanadez të thoshte deri më 28 tetor nëse dëshiron të jetë lider i partisë në zgjedhjet e ardhshme.

Megjithatë, vlen të theksohet se liberalët kanë deri në 153 përfaqësues në parlament, ndaj është e vështirë të flitet për shumicë, shkruan theguardian.

Trudeau erdhi në pushtet në Kanada në nëntor të vitit 2015 dhe ka pasur një mbretërim kryesisht të qëndrueshëm. Megjithatë, në periudhën e fundit ai është nën presion të shtuar për të lënë postin.

Përpjekja zakonisht udhëhiqet nga konservatorët, përkatësisht lideri i tyre, Pierre Poilievre, por tani një kërkesë e ngjashme ka ardhur nga partia e Trudeaus.

Gjegjësisht, me dyer të mbyllura është mbajtur një takim mes deputetëve të Liberalëve, ku është dashur të bisedohet për udhëheqjen e 52-vjeçarit. Megjithatë, nuk ka arritur zgjidhje për situatën në të cilën ndodhet partia.

Sipas sondazheve të fundit, konservatorët kanë 20 për qind më shumë mbështetje se liberalët dhe duhet të fitojnë zgjedhjet e vitit 2025.

Liberalët, nga ana tjetër, duan të shohin sa më shpejt nëse Trudeau planifikon të largohet nga detyra, në mënyrë që të organizohen në kohë për zgjedhjet e vitit të ardhshëm, pra të zgjedhin një lider të ri që të paktën të amortizojë humbjen e pritur. /Telegrafi/