Edhe pak ditë nga konferenca “The Future of Business” në Prishtinë, Shpend Ahmeti tregon për qëllimin dhe rëndësinë e saj

Më 29 tetor 2024, Prishtina do të jetë mikpritëse e edicionit të parë të konferencës “The Future of Business”, një ngjarje që synon të sjellë në një vend liderët e bizneseve të mëdha, rregullatorët, institucionet financiare dhe donatorët për të diskutuar sfidat dhe mundësitë e biznesit në Kosovë.

Në një intervistë për Telegrafin, Shpend Ahmeti, nga Data4X, ka treguar se nga erdhi ideja dhe cili është qëllimi i konferencës.

Sipas Ahmetit, konferenca është rezultat i një iniciative të bazuar në studime të thella dhe parashikime të sakta të bërë nga Data4X që prej vitit 2022.

“Ideja ka ardhur nga studimet e shumta që kemi bërë paraprakisht dhe nga parashikimet tona për sektorët dhe industritë e ndryshme, të cilat kanë pasur një saktësi prej 98 për qind. Kësaj radhe po organizojmë një event më të madh, të cilin e kemi quajtur ‘The Future of Business’,” tha Ahmeti.

Ahmeti theksoi, se qëllimi i kësaj konference është që të bëjë bashkë kontribuesit më të mëdhenjë të Bruto Prodhimit Vendor në Kosovë së bashku me rregullatorët e tregut, institucionet financiare, si dhe donatorët, për të trajtuar temat që ndërlidhen me klimën e të bërit biznes dhe mundësive për të ardhmen.

“Ne kemi realizuar një anketë me mbi 100 bizneset më të mëdha në Kosovë, ku kemi analizuar sfidat e brendshme dhe të jashtme, trendet në industri, digjitalizimin, investimet dhe sfidat në qasjen në financa,” shtoi Ahmeti, duke theksuar rëndësinë e bashkëpunimit midis sektorëve publik dhe privat për përmirësimin e klimës së të bërit biznes në Kosovë.

Ai shtoi se konferenca do të përfshijë tri panele kryesore.

“Paneli i parë, me temën ‘Dialogu me rregullatorët’, do të ketë si panelistë drejtuesit e Administratës Tatimore të Kosovës dhe të Doganave të Kosovës. Paneli i dytë do të fokusohet në trendet dhe mundësitë për bizneset në Kosovë, me pronarë biznesesh si panelistë. Ndërsa paneli i tretë do të trajtojë teknologjinë e informacionit dhe komunikimit (ICT) dhe shërbimet profesionale”.

Ahmeti njoftoi se në edicionin e parë të konferencës do të marrin pjesë rreth 200 pjesëmarrës, e cila do të jetë e tipit të mbyllur, siç tha “Vetëm me ftesa”.

“Kjo është vetëm një nisje, pasi brenda gjysmë dite nuk mund të zgjidhim të gjitha sfidat, por është një hap i rëndësishëm për të nisur diskutimin dhe përmirësimin e të bërit biznes,” theksoi ai.

Në pjesën e dytë të ditës, konferenca do të ketë një fokus të veçantë për Start-Up, ku Data4X ka krijuar një partneritet me Microsoft for Start-Ups.

“Ne jemi kompania e vetme nga Kosova që është pjesë e këtij programi, dhe po punojmë që edhe kompanitë e tjera kosovare të përfitojnë. Start-up-et mund të përfitojnë mbështetje financiare nga 50,000 deri në 250,000 dollarë,” tha Ahmeti, duke njoftuar gjithashtu se do të ketë një prezantim nga menaxheri i programit për Evropën Juglindore të Microsoft.

Përveç diskutimeve rreth sfidave aktuale, në këtë konferencë do të prezantohen edhe parashikimet për vitin 2025 për industritë kryesore në Kosovë. Data4X do të shpalosë të dhënat e saj për të dytin vit radhazi, me një nivel saktësie prej 98%, falë modelit të avancuar të parashikimit.

Konferenca “The Future of Business” pritet të jetë një pikënisje e rëndësishme për nismat e ardhshme që do të ndihmojnë në formësimin e mjedisit të biznesit në Kosovë. /Telegrafi/