Bajrami do përballje televizive me ministrin Murati: Ndikimi i inflacionit në tri vjet të qeverisë Kurti ka qenë 1.6 miliard

Deputetja e LDK-së, Hykmete Bajrami ka prezantuar shifrat e inflacionit në Kosovë.

Ajo është shprehur se ndikimi i inflacionit në tri vjet të qeverisë Kurti ka qenë 1.6 miliard.

Bajrami, akuzoi ministrin e Financave, Hekuran Murati se po mundohet që të manipulojë me çështjen e shifrave të inflacionit.

Sipas ish-ministres së Financave, nuk i ka dy ditë që ministri Murati e bëri një postim për inflacionin 0.2%, dhe pyeti analistët prezent në studio se a kanë parë ndonjëherë postim të Muratit në muajin e gjashtë kur inflacioni ka qenë 14.1%, apo në muajin e shtatë të 2022-ës kur inflacioni ka qenë 14.2%.

“Këto të dhëna janë të Agjencisë së Statistikave të Kosovës, ai i merr prej krejt muajve dhe e zgjedh një muaj kur inflacioni është 0.2% dhe flet për të. Nuk flitet ashtu. Unë jam ajo që po flas me statistika, po flas me të dhënat e Agjencisë së Statistikave të Kosovës. Murati po e merr një muaj ku e ka inflacionin 0.2%, por ai po harron që kjo ngritje e çmimeve që ka ndodhur më 2021 (3.4%), ngritja e çmimeve më 2022 (11.6%), 2023 (4.9%), që në akumulativ bëjnë 22%”.

“Do të thotë që në përgjithësi mesatarja e çmimeve të të gjitha produkteve është rritur me 22%, mirëpo prapë ta kemi të qartë se shporta bazë e konsumit – çaji, buka, sheqeri, kripa, drutë, etj., janë rritur me mbi 50%, dhe energjia elektrike është rritur 100%, dhe këto janë produkte që përbëjnë konsumin për një familje e cila jeton mesatare dhe nën mesatare në Kosovë, e që është pjesa më e madhe e familjeve”, deklaroi Bajrami.

Ajo tutje shtoi se në këtë rast sheh shumë arsye dhe që kishte pasur dëshirë që të përballet qoftë me zëvendëskryeministrin Bislimi, qoftë me ministrin Murati e me këdo qoftë.

“Mirëpo ajo çfarë unë po e bëj demantin sot është jo përmes shifrave të LDK-së, se sikur ai të kishte publikuar shifra dhe unë në anën tjetër pa referenca, ose LDK-ja të kishte publikuar shifra pa referenca, kishte pasur nevojë që me u përballë në studio, por mungesa e tij unë nuk mendoj që po lë hapësirë këtu për vërtetësi sepse ja ku i keni të dhënat prej Agjencisë së Statistikave të Kosovës”, u shpreh Bajrami në KlanKosova.