Kusari Lila tha se do të dalin fotografi të zyrtarëve shtetëror në përurimin e shtëpisë së Radoiçiqit, Tahiri: E rëndësishme të shohim kush janë ata

Ka nisur të mbahet seanca e jashtëzakonshme e Kuvendit të Kosovës lidhur me audio-incizimet e shefes së Grupit parlamentar të Lëvizjes Vetëvendosje, Mimoza Kusari-Lila me ish-nënkryetarin e Listës Serbe, Milan Radoiçiq,

Në këtë seancë të jashtëzakonshme nuk po marrin pjesë deputetët e mazhorancës, LVV-së.

E në nisje të seancës së jashtëzakonshme, shefi i Grupit Parlamentar të Partisë Demokratike të Kosovës, Abelard Tahiri tha se është fatkeqësi i madhe me pa një shumicë prej 50 për qind që i ka fituar zgjedhjet e i ikë ballafaqimit me të vërtetën.

“Nuk e kemi asnjëherë në të kaluarën e shpresoj të jetë hera e fundit që po e shohim”, tha ai, duke shtuar Kusari-Lila dhe deputetët e LVV do të duhej të ishin në Kuvend për tu ballafaquar me të vërtetën.

“Po ashtu, ajo që është shumë e rëndësishme, dje në këtë foltore Mimoza Kusari Lila pati aludime që do të nxirren fotografi dhe pamje nga përurimi i shtëpisë së Radoiçiqit me zyrtarë të shtetit të Kosovës.

I bëra thirrje edhe dje, i bëj thirrje edhe sot se është në interes të shoqërisë dhe shtetit të Kosovës me pa kush janë ata njerëz që kanë marr pjesë në përurimin e shtëpisë së Radoiçiqit, kush janë ata njerëz që kanë dërgu dhurata për familjen dhe fëmijët e tij, pra është në interes sepse një gjë e tillë cenon sigurinë kombëtare të vendit tonë”, u shpreh Tahiri.

Tutje, shefi i GP-së së PDK-së tha se BIA serbe ka ndikuar agjendën e Kuvendit të Kosovës. /Telegrafi/