“Ka me pasë shumë akuza, ndoshta edhe arrestime”, Abrashi i LVV-së: Kjo është arma e fundit e opozitës, prokuroria e kapur

Deputeti i Lëvizjes Vetëvendosje, Artan Abrashi, ka reaguar pas intervistimit të Dejona Mihalit në Prokurorinë Speciale, duke thënë se kryeprokurori Blerim Isufaj dhe njerëzit e PDK-së dhe LDK-së nëpër prokurori dhe gjykata do ta luftojnë LVV-në.

Abrashi ka akuzuar institucionet e drejtësisë, duke i cilësuar të kapura nga partitë që dikur ishin në pushtet.

“Kur Gjykata Kushtetuese merr ndonjë vendim që duket në favor të Qeverisë, menjëherë pasojnë dy-tri vendime kundër kushtetuese ndaj Qeverisë, ndonëse ligjet janë të drejta”, ka shkruar Abrashi, transmeton Telegrafi.

Tutje, deputeti i VV-së prezanton “një analizë të thjeshtë:

A e ka bë Prokuroria Speciale një aktakuzë SUPER TË VONUAR ndaj aktit terrorist në Banjskë, të kryesuar nga Radojçiqi?

Tash, Blerim Isufaj, i cili nuk është emëru Kryeprokuror, thotë kështu: po e bëjmë edhe ne një aktakuzë të madhe (të cilën me siguri se ka bë vetë, por i kanë ndihmu shtetet tona partnere), mirëpo 5 muaj para zgjedhjeve e fton në Prokurori, Dejona Mihalin”, shkruan ai.

Abrashi pyet, “a e dini çfarë mesazhi është ky?”

“Kjo do të thotë që, unë, Blerim Isufaj dhe ne e gjithë PDK e LDK, që jemi në Prokurori e nëpër Gjykata, do ta luftojmë Lëvizjen VETËVENDOSJE!, sidomos në këtë kohë fushate. Fundja, s’ka lidhje pse janë të pafajshëm. Ne e kemi fuqinë të dërgojmë njerëz në burg edhe pa faj’ – po nënkuptohet kjo punë”.

“Me pak fjalë,

Të dashur qytetarë,

Ka me pasë shumë akuza, ndoshta edhe arrestime, mirëpo ka vetëm një gjë: KJO ËSHTË ARMA E FUNDIT E OPOZITËS, PROKURORIA E KAPUR. S’ËSHTË ASNJË E VËRTETË!”, ka shkruar deputeti i VV-së.

Ndryshe, Dejona Mihali, zyrtare e Lëvizjes Vetëvendosje, është intervistuar sot për disa orë në Prokurori. E njëjta pas përfundimit të intervistimit i është përgjigjur shkurt  pyetjeve të gazetarëve.

“Jam intervistuar për zbardhjen e së vërtetës…”, tha ajo.

E pyetur nga gazetarët për cilën të vërtetë është fjala, ajo tha “duhet ta pyesni Prokurorinë”.

Prokuroria njoftoi se Mihali është intervistuar në cilësinë e dëshmitares për disa çështje penale, transmeton Telegrafi.

“Pas interesimit për të marr informacion nga një numër i madh i gazetarëve, Prokuroria Speciale informon se sot, Dejona Mihali, është paraqitur në Prokurorinë Speciale me ftesë të kësaj prokurorie. E njëjta është duke u intervistuar në cilësinë e dëshmitares për disa çështje penale, të cilat kjo prokurori i ka në hetim”, thuhet në njoftim. /Telegrafi/