Hapja e Urës së Ibrit ndez debat, DASH paralajmëron për dhunë – Lajçak mohon deklaratat “mashtruese”

Në një deklaratë të fundit, Departamenti Amerikan i Shtetit (DASH), ka shprehur shqetësimin lidhur me planin e mundshëm për hapjen e urës kryesore mbi lumin Ibër në Mitrovicë.

Sipas DASH, ky veprim i njëanshëm mund të rrezikojë stabilitetin në rajon dhe të rrisë mundësinë e dhunës në një kohë kur tensionet mes Kosovës dhe Serbisë janë të larta.

“Hapja e urës për trafikun e automjeteve tani, rrit potencialin për dhunë dhe vë në rrezik popullatën vendase si dhe ushtarët e KFOR-it – përfshirë amerikanët – të cilët po punojnë për të mbështetur paqen dhe sigurinë në Kosovë”, kanë deklaruar nga DASH për Zërin e Amerikës.

DASH ka kërkuar që Qeveria e Kosovës të veprojë me kujdes dhe të mos ndërmarrë hapa të pakoordinuar që mund të shkaktojnë përshkallëzim të situatës.

Ndërkaq emisari i Bashkimit Evropian për dialogun mes Kosovës dhe Serbisë, Miroslav Lajçak, ka mohuar deklaratat që qarkullojnë se BE-ja është kundër hapjes së urës. Ai i ka cilësuar këto deklarata si mashtruese dhe të pavërteta, duke shtuar se Bashkimi Evropian është i përkushtuar që çdo veprim të ndërmerret në mënyrë të koordinuar dhe të kontribuojë për paqen dhe stabilitetin në Kosovë.

Lajçak ka theksuar se është e rëndësishme që të gjitha palët të përmbahen nga veprime të njëanshme dhe të punojnë për të arritur një marrëveshje të qëndrueshme që adreson shqetësimet e të gjithë komuniteteve në Kosovë.

Ai ka nënvizuar se BE-ja do të vazhdojë të mbështesë procesin e dialogut dhe të inkurajojë zgjidhjen e çështjeve përmes negociatave.

“Marrja e një vendimi kundër vullnetit të njerëzve të prekur, nuk kontribuon në normalizim marrëdhëniesh. Qeverisja e mirë e kupton ndjeshmërinë e minoriteteve”, ka thënë Lajçak, duke paralajmëruar që çështja e zbatimit të marrëveshjes për urën do të diskutohet në takimin e radhës në Bruksel, por pa përmendur ndonjë datë.

Hapja e Urës së Ibrit është një çështje që ka tërhequr vëmendjen e ndërkombëtarëve, duke reflektuar ndjeshmërinë e saj politike dhe simbolike.

Misioni i NATO-s në Kosovë, KFOR, ka paralajmëruar se nuk do të hezitojë të veprojë për t’iu përgjigjur zhvillimeve të lidhura me sigurinë, dhe që secili vendim për urën duhet të merret përmes dialogut Kosovë-Serbi, të ndërmjetësuar nga dialogu në Bruksel.

Zëvendëskryeministri i Kosovës, njëherësh kryenegociator i Kosovës për dialogun në Bruksel, Besnik Bislimi, ka thënë të mërkurën se çështja e hapjes së urës mbi Ibër as “nuk është vendim i njëanshëm” i Qeverisë, e as “çështje e pazgjidhur e dialogut”.

“Një partner i QUINT-it shtoi edhe kërkesën për inspektime teknike. Ne ndoqëm dy rekomandimet. Tani BE-ja po e kërcënon Kosovën, nëse ajo e zbaton marrëveshjen e ndërmjetësuar nga vetë blloku dhe rekomandimet shtesë”, ka thënë Bislimi përmes një postimi në X.

Edhe kryeministri i Kosovës, Albin Kurti, ka thënë se hapja e Urës së Ibrit nuk është kundër askujt e aq më pak ndaj partnerëve, dhe se do t’i vazhdojë konsultimet me partnerët ndërkombëtarë për hapjen e saj. /Telegrafi/