Driton Kuka: Kosova me bilanc të jashtëzakonshëm në olimpiadë, peng është mossuksesi i Akilit

Trajneri i xhudos, Driton Kuka ka thënë se paraqitje e Kosovës deri më tani në Lojërat Olimpike në Paris mund të cilësohet e jashtëzakonshme dhe shumë emocionale gjithashtu për të gjitha garuesit dhe trajnerët.

Ai ka lavdëruar Distria Krasniqin dhe Laura Fazliun për sukseset e tyre duke thënë se përkushtimi i tyre në punë solli këto rezultate.

Kuka: Bilanc i jashtëzakonshëm për Kosovën në Paris

“Është bilanc i shkëlqyeshëm, bilanc jashtëzakonisht i mirë për Kosovën, po vazhdon një trend i medaljeve olimpike i shtetit tonë, u nis në Rio, vazhdoi në Tokio dhe tash edhe në Paris, e jashtëzakonshme, emocionuese, ditë të cilat faktikisht secila ditë në vete i ka storiet e veta, Distria e nisi bukur, shkoi deri në finale, në finale pësoi humbje por ishte e shkëlqyeshme, ajo ka hyrë në historinë e sportit të xhudos në botë, është ndër garueset e rralla, nëse jo e vetmja e cila ka medalje olimpike në të dy kategoritë e ndryshme për vajza”, tha Kuka.

Kuka: Akili e meritoi medaljen olimpike

Ai ka folur edhe për dështimin e Akil Gjakovës për të fituar medalje olimpike

“Akil Gjakova është ajo storia e cila mua personalisht po më bën të ndihem jashtëzakonisht me emocione negative për shkak se e meritoi medaljen olimpike, ndoshta edhe të artën. Ka luftuar si një luan, ka luftuar me masonat e xhudos botërore, ka qenë impresiv, atraktiv, të gjitha mediat kanë shkruar për performancën e tij, arriti deri në gjysmëfinale në mënyrën më të mirë të mundshme”, theksoi Kuka.

Lexo po ashtu Akil Gjakova: Fatkeqësisht fati sportiv ma mori medaljen nga dora, por jo edhe ëndrrën që një ditë ta plotësoj synimin jetësor

Kuka: Laura kishte edhe fat në luftën e saj për medalje

Medaljen e bronztë të fituar nga Laura Fazliu, Kuka thotë se përtej angazhimit të xhidistes nga Mitrovica, në anën e Kosovës në këtë rast ishte edhe fati, sidomos në luftën finale.

“Laura ishte e kundërta e Akilit edhe pse nuk ishte në ditën e saj të mirë edhe pse ngarkesa e madhe psiqike për të fituar medalje bëri që ajo të mos jetë më shumë se 60 përqindëshi i saj, por ajo kishte fat edhe në luftën me kanadezen ishte në nivel shumë të lartë, me kinezen fitoi me një luftë shumë të barabartë, por për një nuancë ishte më e mirë…Në luftën për medalje, një luftë e cila shkoi zhag deri në vazhdime kur kishin dyat nga dy penalizime, ndodhi një aksion i Laurës të cilin garuesja kroate e kontroi në mënyrën jo të duhur sepse kapjet për këmbë tashmë janë të ndaluara”, deklaroi më tutje Kuka.

Lexo po ashtu Mediumi britanik lartëson Laura Fazliun, krahason fitoren e saj me foton ikonike të Muhammad Ali

Kuka: I lumtur që përmbusha synimin tim për pesë medalje olimpike

Tejet i lumtur Kuka u shpreh edhe me përmbushjen e synimit të tij për t’i pasur pesë medalje olimpike të fituara.

“Pas fitores së Distrias e mendoja tërë kohën që mos diçka po e ndal atë dëshirën time të madhe drejtë medaljes së pestë për ta përmbushur veten, për t’i përmbushur ato rrathët olimpik, ndodhi ajo që ndodhi dhe jam shumë i lumtur, do të thotë numri pesë është përmbushur për mua si trajner por në radhë të parë për Kosovën, për shtetin tonë të ri për të cilin ne punojmë dhe veprojmë”, tha Kukan ë fund.

Nga sporti i xhudos, ende nuk ka garuar xhudistja Loriana Kuka.