Çitaku: Nuk shohim mundësi për koalicion PDK-LVV

Vlora Çitaku, sekretare e përgjithshme e Partisë Demokratike të Kosovës, mohoi mundësinë e bashkëqeverisjes në të ardhmen me Lëvizjen Vetëvendosje.

Çitaku tha se PDK dhe LVV kanë dallime të mëdha qoftë politike, ideologjike dhe në sfera të tjera.

“Ne jemi në zgjedhje për t’i fituar ato dhe për t’i ofruar qytetarit të Kosovës një model ndryshe nga LVV. Ne nuk shohim mundësi që me Vetëvendosje t’i realizojmë planet dhe projektet tona”, tha ndër të tjera Çitaku, për RTK.

Ajo më tej tha se partia e saj shkon në zgjedhje për të fituar e jo për të bashkëqeverisur  me LVV-në.

E për anëtarësimin e Kosovës në Këshillin e Evropës, Çitaku tha se kjo çështje është një rast i humbur.

Ajo pati kritika ndaj Ministrisë së Jashtme të Kosovës, për të cilën tha se është inekzistente, derisa shtoi se pas përjashtimit të Rusisë në Këshillin e Evropës (KiE), Kosova kishte shanse të mira për t’u anëtarësuar.

Lexo po ashtu Krasniqi thotë se me Kurtin bisedoi për zgjedhjet e ardhshme

Vënia e Asociacionit si kusht për anëtarësim në KiE, për Çitakun ishte i padrejtë, por që, shtoi ajo, kjo erdhi nga shkaku i mosbesimit të aleatëve tanë ndaj krerëve tanë të shtetit, ndonëse janë zotuar për ta bërë atë.

“Te ky rezultat kemi ardhur për sjellje të papërgjegjshme të rrezikshme të kryeministrit Kurti në raport me dialogun me Serbinë, por edhe në raport me aleatët”, deklaroi Çitaku.

Duke folur për Asociacionin dhe për raportet me ndërkombëtarët, Çitaku tha se tani është një situatë kur aleatët tanë kanë humbur ambicien për një marrëveshje finale gjithëpërfshirëse me njohjen reciproke në qendër.

Lexo po ashtu Hoxha: Shoh shenja që LVV dhe PDK mund të bëhen bashkë

“Ndërkaq ne do ta trajtojmë çështjen e Asociacionit seriozisht, si pjesë të marrëveshjes finale me njohje reciproke në qendër, por jo ky draft-statut, por një draft-statut që Kosova do ta shkruaj vet”, tha Çitaku, duke shtuar ky ndryshim mund të arrihet nëse përfaqësuesit institucionalë nuk janë cinikë dhe të jenë të përgjegjshëm me aleatët tanë ndërkombëtarë.

Duke folur për partinë e saj, Çitaku tha se PDK është parti që merr vendime dhe që kryen projekte të mëdha.

“Detyra e lartë e politikës është që të ofrojë zgjidhje, ngase po besojmë se Kosova është në një agoni”, tha Çitaku.

Ajo për takimin e djeshëm mes Kurtit e Krasniqit, mohoi mundësinë e ndonjë konspiracioni, teksa shtoi se për PDK-në, e rëndësishme që të ketë zgjedhje sa ma parë.