Deputeti i LVV-së përplaset me Visar Ymerin për projektligjin që hap rrugën për martesa brenda gjinisë së njëjtë

Deputeti i LVV-së Visar Korenica është përplasur me ish-deputetin Visar Ymeri në lidhje me Projektligjin për Kodin Civil që ka dështuar disa herë në Kuvendin e Kosovës.

Korenica ka thënë se ai voton në Kuvend në bazë të bindjeve të tij personale.

“Unë nuk besoj në ato të drejta që duan t’u jepen grupeve të caktuara. Për mua është shumë e rëndësishme si e shoh raportin mes palëve në familje”, ka deklaruar.

Derisa ish-deputeti Visar Ymeri e ka konsideruar këtë “mendim shumë të rrezikshëm”.

“Jo vetëm këtë që po e thotë deputeti [Korenica], por që njëjtë mendojnë ndoshta shumica në Kosovë. Të drejtat e njeriut nuk varen ajo se si mendojnë shumica. Të drejtat e njeriut nuk mund të vendosen në diskutim e as cenohen edhe nëse i ke shumicën e votave. Në rregull është të kesh mendim ndryshe, por jo kur vie në pyetje për respektimin e të drejtave të njeriut”.

Ymeri thotë se nëse me shumicë votash do të ndalohej një e drejtë e njeriut, Kosova do të kalonte në një shoqëri totalitare.

E ndaj këtij pretendimi ka reaguar Korenica.

“A është Zvicra shoqëri totalitare?”, ka pyetur deputeti duke pretenduar se diçka e tillë është edhe në Zvicër.

“Unë nuk dua ta lejoj me ligj që personave me gjini të njëjtë të lidhin një martesë dhe nesër këtyre t’iu lejohet birësimi i një fëmije. Kjo është bindja ime personale. Kjo nuk është në natyrshmërinë e njeriut”, a shtuar Korenica.

“Ju si individ flisni çka të doni publikisht, por si vendimmarrës po ua cenoni një të drejtë një çifti vendimmarrës. Ti po iu thua atyre: ja duhet të jetoni si them unë, ja nuk bën ndryshe”, ka replikuar Ymeri./Telegrafi/