“Atij i pëlqejnë Ibrahimovic dhe Batistuta, por mua ma kujton Ronaldinhon” – Motta flet për lojtarin e tij kryesor

Thiago Motta është i lumtur që Bologna mundi Lazion, ndërsa nënvizoi se ylli i ekipit të tij Joshua Zirkzee ia kujton atij Ronaldinhon.

Zirkzee kur ishte rezultati 1-1 shënoi golin e fitores, që i dha tri pikë Bolognas që po lufton për një vend në garat evropiane.

Ky ishte goli i tetë i Zirkzees në Serie A dhe është golashënuesi më i mirë i ekipit të tij, ndërsa trajneri Motta e krahasoi me Ronaldinhon.

“Ai tha se idhujt e tij janë Ibrahimovic dhe Batistuta, të cilët janë dy lojtarë të shkëlqyer. Duke e parë atë ditë për ditë, ai më kujton Ronaldinhon me të cilin kam luajtur në Barcelonë, por nuk mund ta krahasoj me askënd”.

“Ai është Joshua, është i veçantë, i pëlqen futbolli dhe mbi të gjitha punon shumë në stërvitje”.

Lexo po ashtu Rritet konkurrenca për transferimin e Joshua Zirkzee, holandezi kërkohet nga pesë klube angleze

“Që nga dita e parë e para-sezonit, ai ka qenë gjithmonë i pari që ka mbërritur në kamp. Ai është bërë një lider dhe kjo është e gjitha për meritën e tij. Thjesht duhet të vazhdojmë ta shoqërojmë, sepse sigurisht që është në rrugën e duhur”, deklaroi Motta.

Bologna ka 45 pikë dhe mban vendin e pestë në renditje me pikë të barabarta me Atalantan që është e katërta./Telegrafi/