NATO kritikon Donald Trump për komentet rreth anëtarëve të aleancës që nuk paguajnë mjaftueshëm për mbrojtjen

NATO ka kritikuar komentet e bëra nga Donald Trump në një ngjarje të fushatës – duke pretenduar se ato “i vënë ushtarët amerikanë dhe evropianë në rrezik të shtuar”.

Ish-presidenti i SHBA-së kishte thënë se do ta linte Rusinë “të bëjë çfarë të dëshirojë” ndaj anëtarëve të aleancës që nuk paguajnë mjaftueshëm për mbrojtjen, shkruan Sky News, përcjell Telegrafi.

Në një tubim në Karolinën e Jugut të shtunën, Trump kujtoi një shkëmbim me një “vend të madh” pa emër, i cili pyeti nëse do të mbroheshin nëse Rusia i sulmonte.

“Unë i thashë: ‘Nuk keni paguar? Ju jeni delikuent?’ Jo, nuk do t’ju mbroja. Në fakt, do t’i inkurajoja ata të bëjnë çfarë të duan. Ju duhet të paguani. Ju duhet të paguani faturat tuaja”, citohet të ketë thënë ai para turmës.

Dhe në përgjigje të deklaratave të tij, NATO tha: “NATO mbetet e gatshme dhe e aftë për të mbrojtur të gjithë aleatët. Çdo sulm ndaj NATO-s do të përballet me një përgjigje të bashkuar dhe të fuqishme”.

“Çdo deklarim se aleatët nuk do të mbrojnë njëri-tjetrin minon të gjithë sigurinë tonë, përfshirë atë të SHBA-së, dhe i vë ushtarët amerikanë dhe evropianë në rrezik të shtuar”.

“Presim që pavarësisht se kush do të fitojë zgjedhjet presidenciale, SHBA do të mbetet një aleat i fortë dhe i përkushtuar i NATO-s”.

Komentet e Trump ka të ngjarë të rrisin frikën në Evropë për tërheqjen e mbështetjes ushtarake të SHBA nga Ukraina, nëse ai rizgjedhur më vonë këtë vit.

Ish-presidenti gjithashtu ka kritikuar prej kohësh NATO-n, duke kërcënuar se do të tërheqë SHBA-në nga aleanca.

Një nga angazhimet e tij të fushatës është të rivlerësojë “thelbësisht” “qëllimin dhe misionin e NATO-s”.

Ndërkohë vë në pah Sky News, Shtëpia e Bardhë i përshkroi komentet e Trumpit si “të tmerrshme dhe të pakontrolluara”.

“Inkurajimi i invadimit të aleatëve tanë më të ngushtë nga regjimet vrasëse rrezikon sigurinë kombëtare amerikane, stabilitetin global dhe ekonominë tonë në vend”, tha zëdhënësi i Shtëpisë së Bardhë, Andrew Bates, në një deklaratë të shtunën mbrëma.

“Në vend që të bëjë thirrje për luftëra dhe të promovojë kaos të çmendur, presidenti Biden do të vazhdojë të forcojë udhëheqjen amerikane dhe të mbrojë interesat tona të sigurisë kombëtare – jo kundër tyre”. /Telegrafi/