Bexheti: Kurti me veprimin e tij të sotëm, bëri një hap mbrapa me Maqedoninë

Profesori nga Maqedonia Nuri Bexheti ka kritikuar takimin e kryeministrit të Kosovës, Albin Kurti, me opozitën shqiptare të Maqedonisë së Veriut.

Bexheti, në RTV Dukagjini, thotë se me veprimin e sotëm, Kurti ka bërë një hap mbrapa.

“Pati një komunikatë nga Zyra e Kryeministrit të Kosovës mbi takimin me opozitën shqiptare të Maqedonisë së Veriut, dhe në komunikatë thuhet se katër udhëheqësit shprehën propozimin e tyre për një president të Maqedonisë së Veriut, i cili kësaj radhe duhet të vijë nga mesi i shqiptarëve”, tha ai.

“Kurti me këtë veprim që bëri po e favorizon kandidatin për president të partisë opozitare maqedonase, partia VMRO, e cila mund të ketë një kandidat ndoshta shumë më nacionalist se kandidati aktual i Republikës së Maqedonisë. Me veprimin e sotëm, Kurti bëri një hap mbrapa dhe si po duket ai po mbështet një kandidat që ka gjasa që do të vijë nga një frymë më nacionaliste, që i bie se Kurti me sot është i involvuar me këmbë e me duar dhe është burrështetasi i tretë që bën një gabim të madh”, shtoi më tej ai.

Lexo po ashtu Ministri i Jashtëm i Maqedonisë: Nëse deklarata e Qokut është në cilësinë e këshilltarit të Kurtit, do të ishte problematike

Sipas Bexhetit, involvimi i Kurtit nuk u bën mirë shqiptarëve në Maqedoninë e Veriut.

Nga ana tjetër, analisti Imer Mushkolaj, ka thënë se kryeministri i Kosovës, Albin Kurti, do të themelonte partinë në Maqedoninë e Veriut, por këtë nuk ia lejon ligji atje, teksa shton se Kurti me partinë e tij, dështoi në Shqipëri

Mushkolaj thotë se Kurti e ka gjetur mënyrën që të hyjë në lista zgjedhore në Maqedoni.

“Albin Kurti do të themelonte partinë në Maqedoni, por nuk ia lejon ligji, dhe ai ka gjetur këtë mënyrën që të hyjë në lista zgjedhore. Kurti ka dështuar në Shqipëri dhe shumë mirë që ka dështuar dhe ishte një hyrje flagrante e LVV-së dhe Kurtit në Shqipëri, atje iu shua partia”, thotë Mushkolaj.