“Mobilizohen” vendet baltike mes shqetësimeve të sigurisë, Estonia planifikon ndërtimin e qindra bunkerëve në kufi me Rusinë

Letonia, Lituania dhe Estonia u dakorduan të premten për të krijuar një zonë të përbashkët mbrojtëse baltike në kufijtë e tyre me Rusinë dhe Bjellorusinë, mes shqetësimeve në rritje të sigurisë.

Ministrat e mbrojtjes së tre vendeve baltike u takuan të premten në Riga për të miratuar ndërtimin e “instalimeve mbrojtëse” në kufijtë e tyre lindorë. Ata ranë dakord gjithashtu për të zhvilluar bashkëpunimin raketor dhe të artilerisë, transmeton Telegrafi.

Ministri estonez i Mbrojtjes Hanno Pevkur theksoi nevojën për bunkerë në kufi, duke thënë: “Lufta e Rusisë në Ukrainë ka treguar se përveç pajisjeve, municioneve dhe fuqisë punëtore, ne kemi nevojë edhe për struktura mbrojtëse fizike në kufi nga metri i parë për të mbrojtur Estoninë”.

Lexo po ashtu Britanikët “deklasojnë” të gjithë me armën e re, shkatërron dronët me shpejtësinë e dritës

Estonia do të ndërtojë 600 bunkerë përgjatë kufirit të saj prej 294 kilometrash me Rusinë, me një buxhet fillestar prej 60 milionë euro, sipas transmetuesit publik të Estonisë ERR. Çdo bunker është projektuar për të akomoduar 10 ushtarë. Ministria e Mbrojtjes e Estonisë planifikon të fillojë ndërtimin e bunkerit në fillim të vitit 2025.

Lexo po ashtu Rrezik nga sulmi rus, por çka ndodh kur sulmohet një vend i NATO-s dhe si reagon Aleanca Transaltantike?

Detajet për planet e Lituanisë dhe Letonisë në ndërtimin e zonës së përbashkët të mbrojtjes nuk janë zbuluar ende.

Megjithatë, ministri lituanez i Mbrojtjes Arvydas Anusauskas nënvizoi bashkëpunimin e vazhdueshëm me SHBA-në në zhvillimin e aftësive raketore HIMARS, një aspekt thelbësor i strategjisë së tyre të mbrojtjes.

Ministri letonez i Mbrojtjes, Andris Spruds theksoi përfundimin e planit ushtarak të Letonisë kundër lëvizshmërisë, i cili do t’i paraqitet qeverisë në fund të janarit, duke përfshirë masa të ndryshme për forcimin e kufijve afatshkurtra dhe afatgjata.

Për më tepër, një marrëveshje bashkëpunimi u nënshkrua midis Estonisë dhe Letonisë për kryerjen e kontrolleve ajrore të NATO-s nga baza ajrore e Letonisë Lielvarde, duke kompensuar mungesën e përkohshme të bazës ajrore Ämari të Estonisë për shkak të riparimeve.

Vendimet për forcimin e kufijve vijnë edhe mes paralajmërimeve të fundit nga ministri gjerman i Mbrojtjes Boris Pistorius i cili sugjeroi në një intervistë me Tagesspiegel të publikuar të premten se një sulm rus ndaj NATO-s mund të ndodhë brenda pesë deri në tetë vjet. /Telegrafi/